Yo Alloh! Menga imon, sidqidillik, sog‘liq, ofiyat va sog‘lom bir niyat ber.
Yo Alloh! Umrimning oxirini eng xayrlisi, amalimning nihoyasining xayrlisi va Sening jamolingni ko‘radigan kunimni kunlarimning eng xayrlisi qil!
Hazrat Umar
(roziyallohu anhu) duosi
Yo Alloh! Meni nogahon o‘limdan yo g‘aflatda qoldirishing yoki g‘ofillardan qilishingdan asrashingni so‘rayman.
Yo Alloh! Meni yaxshilar orasida o‘ldir, yomonlardan qilma, otash azobidan asra va yaxshilar qatoriga qo‘shgin.
Hazrat Ali
(roziyallohu anhu) duosi
Yo Alloh! Balo va musibatlardan, omadsizlikdan, dushmanlar bilan tortishishdan, hibs etilishdan, kishanlanishdan va kaltaklanishdan meni asra.
Yo Alloh! Mening gunohlarim Senga zarar qilmaydi. Sening menga marhamat qilishing Sening marhamatingni kamaytirmaydi.
Abdulloh ibn Mas’ud
(roziyallohu anhu) duosi
Yo Alloh! Sendan o‘zgarmas kuchli imon, tuganmas ne’mat va xuld jannatining eng yuqori darajasida Payg‘ambaring bilan birga qilishingni so‘rayman.
Ey Rabbimiz! Kelisholmaganlarimizni yarashtir, bizni Islom yo‘liga hidoyat ayla, bizni zulmatdan yorug‘likka chiqar. Bizdan oshkor va yashirin barcha yomonliklarni ketkaz. Ko‘zlarimizga, quloqlarimizga, qalblarimizga, ishlarimizga, ayollarimizga va farzandlarimizga baraka ato ayla, gunohlarimizni kechir. Shubhasiz, Sen marhamatli va gunohlarni kechirguvchisan. Bizni ne’matingga shukr etuvchi, hamd aytuvchi qil va ne’matingni bizdan ayama! («Al-Kanz», «Al-Muntahab»dan.)
Abdurahmon ibn Avf
(roziyallohu anhu) duosi
Abu Hayyoj Asadiy (roziyallohu anhu)dan: «Bir kuni Baytullohni tavof qilayotgan bir odamning tinimsiz: «Yo Alloh! Meni nafsimning ochko‘zligi (tamagirligi)dan asra!» deya duo qilayotganini ko‘rdim. Unga yaqinlashib dedim:
Allohdan shundan boshqa so‘raydigan narsang yo‘qmi? Faqat bir duoni qaytaryapsan?
Agar nafsimning ochko‘zligidan (tamagirligidan) saqlansam, na o‘g‘rilik, na zino va na biror gunoh qilaman, – dedi.
Qarasam, u odam Abdurahmon ibn Avf (roziyallohu anhu) ekan (Tafsiri Ibn Kasirdan).
Hazrat Bilol
(roziyallohu anhu) duosi
Yo Alloh! Mening yomonliklarim va nuqsonlarimni kechirgin.
Abu Dardo
(roziyallohu anhu) duosi
Bilol ibn Sa’d (roziyallohu anhu)dan: Abu Dardo (roziyallohu anhu) der edi:
Yo Alloh! Xayol tarqoqligidan asrashingni so‘rayman.
“Xayol tarqoqligi nima?”, deya so‘rashdi.
“Kishining har bir darada bir mulki bo‘lishidir”, deya javob berdi u.
Yo Alloh! Olimlarning qalblari menga la’nat o‘qishidan panoh so‘rayman, deya duo qilgan Abu Dardodan so‘rashdi:
“Olimlarning qalblarining la’nat o‘qishi qanday bo‘ladi?”
“Menga nisbatan nafrat etishlaridir”, dedi Abu Dardo.
Zayd ibn Sobit
(roziyallohu anhu) duosi
Yo Alloh! Sendan bola-chaqam va qo‘l ostimda menga qarab qolgan qullarimni boqishga yetgulik boylik so‘rayman. Va biror qarindoshimning qarindoshlik haqini ado etolmaganim uchun meni badduo qilishidan panoh tilayman.
Sa’d ibn Uboda
(roziyallohu anhu) duosi
Yo Alloh! Senga hamd aytishni menga nasib et.
Ibn Abbos
(roziyallohu anhu) duosi
Yo Alloh! Meni bergan rizqingga qanoat etguvchilardan ayla, menga bergan rizqni barakotli qil va orqada qoldirgan har narsamni O‘zing asra.
Anas
(roziyallohu anhu) duosi
Yo Alloh! Uni (musulmon birodarimni) kechalari ibodat qiluvchi va kunduzlari ro‘zador kishilar duosining barakotidan mahrum etma.
Mehr-saxovat va inson qadri — ezgulikka yo‘g‘rilgan xayrli tashabbus
14.08.2026
55963
3 min.
Insonga mehr ko‘rsatish, muhtojning holidan xabar olish, bemorga tasalli berish va ehtiyojmandlarga ko‘mak qo‘lini cho‘zish xalqimiz ma’naviyatining azaliy fazilatlaridandir. Islom ta’limotida ham saxovat, mehr-oqibat va inson qadrini ulug‘lash eng ulug‘ amallardan biri sifatida e’tirof etilgan. Chunki bir insonning ko‘nglini ko‘tarish, uning qalbiga umid va ishonch bag‘ishlash jamiyatda mehr-muhabbat, hamjihatlik va totuvlikni mustahkamlaydi.
Shu ezgu qadriyatlarni hayotga tatbiq etish, aholining ehtiyojmand qatlamlarini qo‘llab-quvvatlash va yurtdoshlarimiz qalbida mehr-shafqat tuyg‘ularini yanada kuchaytirish maqsadida 2026 yil 13 avgust kuni Samarqand viloyati Urgut tumanida keng ko‘lamli ma’naviy-ma’rifiy hamda xayr-saxovat tadbirlari o‘tkazildi.
Mazkur xayrli tadbirlarda Samarqand viloyati bosh imom-xatibi vazifasini vaqtincha bajaruvchi Nursultonxon domla Abdumannonov, viloyat bosh imom-xatibi o‘rinbosari Xayrullo domla Sattarov, VAQF xayriya jamoat fondi Samarqand viloyati filiali rahbari Yoqubjon domla Mansurov, uning o‘rinbosari A.Sultonov, shahar va tuman bosh imom-xatiblari, «Haj–2026» ziyoratchilari, mahalla faollari va nuroniylar ishtirok etdilar.
O‘zbekiston Respublikasi davlat mustaqilligining 35 yilligi munosabati bilan o‘tkazilgan ushbu xayrli aksiya doirasida ijtimoiy himoyaga muhtoj, kam ta’minlangan va boquvchisidan ayrilgan 300 ta oila holidan xabar olindi. Ularning xonadonlariga tashrif buyurilib, turmush sharoitlari o‘rganildi, oilalarga zarur oziq-ovqat mahsulotlari yetkazib berildi.
Tashriflar davomida bemor va keksalarning holidan xabar olinib, ular bilan samimiy suhbatlar o‘tkazildi. Ularning haqqiga shifo, xonadonlariga fayzu baraka, yurtimizga tinchlik-xotirjamlik tilab duolar qilindi. Zero, muhtojning ko‘nglini ko‘tarish va uni yolg‘iz emasligini his ettirish ham insonparvarlikning yuksak ko‘rinishidir.
Shu bilan birga, hayotida turli ijtimoiy qiyinchiliklarga duch kelgan hamda yot g‘oyalar ta’siriga tushib qolish xavfi mavjud bo‘lgan ayrim fuqarolar bilan yakka tartibda muloqotlar tashkil etildi. Suhbatlarda sof e’tiqod, oila muqaddasligi, farzand tarbiyasi, halol mehnat, Vatanga sadoqat, milliy va diniy qadriyatlarga hurmat, shuningdek, turli buzg‘unchi g‘oyalarga nisbatan ma’naviy immunitetni mustahkamlash masalalari hayotiy misollar asosida tushuntirildi.
Tadbirlar doirasida Urgut tumanidagi jome masjidlarda peshin namozidan so‘ng ma’naviy-ma’rifiy uchrashuvlar ham o‘tkazildi. Ularda mehr-oqibat, qo‘ni-qo‘shnichilik munosabatlarini mustahkamlash, yoshlarni milliy va diniy qadriyatlarga sodiqlik ruhida tarbiyalash, oila tinchligini asrash, jamiyatda o‘zaro hurmat va ahillik muhitini qaror toptirish kabi dolzarb mavzular atroflicha yoritildi.
Uchrashuvlar yakunida mamlakatimiz tinchligi, xalqimiz farovonligi, Vatanimiz ravnaqi va yosh avlodning ilmli, odobli hamda vatanparvar insonlar bo‘lib voyaga yetishi haqida xayrli duolar qilindi.
Bugun yurtimizda inson qadrini ulug‘lash, aholining ehtiyojmand qatlamlarini har tomonlama qo‘llab-quvvatlash, jamiyatda mehr-saxovat va o‘zaro g‘amxo‘rlik muhitini qaror toptirishga alohida e’tibor qaratilmoqda. Urgut tumanida o‘tkazilgan mazkur xayrli tadbirlar ham ana shu ezgu maqsadlarga xizmat qilib, aholi o‘rtasida hamjihatlik, bag‘rikenglik va insonparvarlik tuyg‘ularini yanada mustahkamladi.
Mehr bor joyda ishonch, saxovat bor joyda baraka, inson qadri ulug‘langan jamiyatda esa tinchlik va farovonlik qaror topadi. Ana shunday ezgu amallar xalqimiz o‘rtasidagi birdamlik rishtalarini mustahkamlab, yurtimizning yanada obod va fayzli bo‘lishiga xizmat qiladi.
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
