Namoz saboqlari: Qur’oni karimdan ba’zi duolar (Audio)
19.12.2019
4602
3 min.
Alloh taolo bunday marhamat qiladi: «Sizdan (ey Muhammad!) bandalarim Mening haqimda so‘rasalar, (ayting) Men ularga yaqinman. Menga iltijo qiluvchining duosini ijobat eturman. Bas, ular ham Meni (da’vatlarimni) ijobat (qabul) etib, Menga imon keltirsinlar, shoyad (shunda) to‘g‘ri yo‘lga tushib ketsalar» (Baqara surasi, 186-oyat).
«Ey Rabbimiz! Biz o‘zimizga (o‘zimiz) zulm qildik. Agar bizni kechirmasang va bizga rahm qilmasang, biz, albatta, ziyon ko‘ruvchilardan bo‘lib qolurmiz» (A’rof surasi, 23-oyat).
«Rabbim! Men Sendan o‘zim (yaxshi) bilmagan narsani so‘rashimdan panoh tilayman. Agar meni kechirmasang va menga rahm qilmasang, albatta, ziyon ko‘ruvchilardan bo‘lib qolurman»(Hud surasi, 47-oyat).
«Ey Rabbim, bu buzg‘unchilar qavmi ustidan O‘zing meni g‘olib qil!» (Ankabut surasi, 30-oyat).
«Ey Rabbim! Meni va zurriyotimdan (ko‘p farzandlarimni) namozni barkamol ado etuvchi qilgin! Ey Rabbimiz! Duoimni qabul et! Ey Rabbimiz! Hisob-kitob qilinadigan (qiyomat) kuni meni, ota-onamni va (barcha) mo‘minlarni mag‘firat qilgin!» (Ibrohim surasi, 40–41-oyatlar).
«Ey osmonlar va Yerni ijod etgan Zot! Dunyoyu oxiratda O‘zing egamdirsan. (Ajalim yetganida) musulmon holimda vafot ettir va meni solihlar (qatori)ga qo‘shgin!» (Yusuf surasi, 101-oyat).
«Tavakkulni Allohga qildik. Ey Rabbimiz! Biz bilan qavmimiz o‘rtasida haqqoniy hukm qil! Sen hukm qiluvchilarning yaxshisidirsan» (A’rof surasi, 89-oyat).
«Ey Rabbim! (Bu qiyin vazifaga) bag‘rimni keng qilgin va ishimni oson qilgin hamda tilimdan tugunni (duduqlikni) yechib yuborgin, (toki) ular (qavmim) gapimni (yaxshi) anglasinlar» (Toho surasi, 25–28-oyatlar).
«Ey Rabbim! O‘zing menga (bu) zolimlar qavmidan najot bergin!» (Qasas surasi, 21-oyat).
«Sendan o‘zga iloh yo‘qdir. Sen (barcha) nuqsonlardan pokdirsan. Darhaqiqat, men (o‘zimga) zulm qiluvchilardan bo‘ldim» (Anbiyo surasi, 87-oyat).
«Ey Rabbim! Meni yolg‘iz tashlab qo‘yma (merosxo‘r farzand ato et!) Sen (O‘zing) vorislarning yaxshirog‘idirsan»(Anbiyo surasi, 89-oyat).
«Rabbim, menga (ham) o‘z huzuringdan pok zurriyot ato et! Darhaqiqat, Sen duoni eshituvchidirsan» (Oli Imron surasi, 38-oyat).
«Ey Rabbimiz, bizni hidoyat yo‘liga solganingdan keyin dillarimizni (to‘g‘ri yo‘ldan) og‘dirma va bizga huzuringdan rahmat ato et! Albatta, Sen Vahhob (barcha ne’matlarni tekin ato etuvchi)dirsan» (Oli Imron surasi, 8-oyat).
«Ey Rabbim! Meni (qabrga) sodiqlik bilan (gunohlarim kechirilgan holimda) kiritgin va (tiriltirganingda ham) sodiqlik (roziliging bilan) chiqargin hamda men uchun o‘z dargohingdan bir madad beruvchi hujjat ato qilgin» (Isro surasi, 80-oyat).
«Ey Rabbim! Menga (kofirlarga) va’da qilinayotgan narsa (azob)ni ko‘rsatsang-chi?! Ey Rabbim! (o‘shanda) meni u zolimlar qavmi ichida (turuvchi) qilmagin!». «Ey Rabbim! Men Sendan shaytonlarning vasvasalaridan panoh berishingni so‘rayman. Yana men Sendan, ey Rabbim, ular mening huzurimga kelishlaridan panoh so‘rayman». «Ey Rabbim! (Gunohlarimizni) mag‘firat et va (holimizga) rahm ayla! Sen (o‘zing) rahm qiluvchilarning yaxshisidirsan». (Mu’minun surasi, 93,-94-,97-,98-,118-oyatlar).
«Ey Rabbim! Menga ilmni ziyoda et!» (Toho surasi, 114-oyat).
«Ey Rabbimiz, bizlar Senga imon keltirganmiz. Bas, bizning gunohlarimizni kechir va bizni do‘zax azobidan asra!»(Oli Imron surasi,16-oyat).
Ey Robbim! Orzularimning ro‘yobini nasib et va mendan umidsizlikni ketkaz.
Ey Robbim! Muhabbat latofatini qalbimga joyla va kek tikonlarini sug‘urib tashla.
Ey Robbim! Nafsimning istaklariga g‘olib kelishni nasib et, birovlarning ayblarini bo‘rttirib yubormasligim uchun ko‘zimga qora parda tort.
Ey Robbim! Qalb ko‘zimni nurlantirginki, o‘z ayblarimni yaxshiroq ko‘rayin va boshqalarning ayblarini bo‘rttirib yubormasligim uchun ko‘zimga qora parda tort.
Ey Robbim!Odamlarga quvonch ulashib, ularni saodatmand etishimda menga yordam ber. Shu orqali ularning baxtiyor kunlarini ko‘paytirib, ko‘z yoshlari bilan o‘tajak tunlarini kamaytira olsam .
Ey Robbim! Menga afv etish lazzatini ato et. O‘ch olishga bo‘lgan ishtiyoqdan mahrum qil. Kuchlilar qarshisida meni zaiflardan va ro‘paramda zaiflar turganida zulmkorlardan aylama.
Ey Robbim! Qalbimga bag‘rikenglik va rahmat urug‘ini sep, ko‘ngil bog‘larimdan taassub va qahri qattiqlikni sug‘urib tashla.
Ey Robbim! Qalbimni iymon, har tarafimni O‘zingga muhabbat ila limmo-lim ayla va butun tanamga ixlosli bo‘lishni nasib et.
Ey Robbim! Sen yaratgan narsalarning go‘zalligini ko‘ra olishim uchun ko‘zlarimni kattaroq och.
Ey Robbim! G‘urur ko‘zlarimni ko‘r qilgan chog‘da, qalb ko‘zimni nurlantir. Menga xorlik hukmron bo‘lgan on azizlik ila martabamni ko‘tar. Bordi-yu, davr alg‘ov-dalg‘ov bo‘lib, tashqi kuch oldida boshim egilsa, kuch-quvvat doimiy emasligini, haq gap esa barhayot va boqiy ekanini menga eslat.
Ey Robbim! Chohga qulaganim on tik turishni o‘rgat. Qaddimni rostlagan paytim boshqa yiqilganlar bor ekanini yodimga solginki, bo‘ynimni egib, ularning qadlari rost bo‘lishi uchun ko‘mak qo‘limni cho‘zayin.
Ey Robbim! Qarshi taraf ustidan g‘alaba nasib etsang, ularning ustidan kulishdan saqla.
Ey Robbim! Qanoat qilish va yo‘q bo‘lib ketish orasini, izzat va g‘urur orasini, kamtarlik va xorlik orasini ajrata oladigan qil.
Ey Robbim! Haq kuchlilar yoki zaiflar tarafida bo‘lmasin, haqqa ko‘makchi bo‘lishim uchun menga quvvat ato et.
Ey Robbim! Zulmatlarni aritadigan kichik bir shamchiroq bo‘lishimda menga ko‘mak ber.
Ey Robbim! Odamlar orasida muruvvatni yoyishimda, ularga intiqom zaifning quroli, kengbag‘irlik kuchlilarning aslahasi ekanini tom ma’noda anglay olishimga va ular mening gaplarimdan qanoat hosil qilishlarida menga madad ber.
Ey Robbim! Xatolarimdan qutulishim uchun xatolarimni tan olishimda madad ber. O‘zgalarning aybu nuqsonlarini, xatolarini fosh etishdan asra.
Ey Robbim! Meni yomon ko‘rganlarni men yomon ko‘rmay, meni yaxshi ko‘rganlarga ko‘proq muhabbat qo‘yay.
Ey Robbim! Agar odamlarning haqlari borasida xatoga yo‘l qo‘ysam, sodir etgan xatolarim uchun ulardan uzr so‘rashimda O‘zing qo‘lla. Agar odamlar mening haqimda xato qilsalar, ularning bu xatolarini kechirib yuborishim uchun kuch ato et.
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
