Namoz saboqlari: Qur’oni karimdan ba’zi duolar (Audio)
19.12.2019
4648
3 min.
Alloh taolo bunday marhamat qiladi: «Sizdan (ey Muhammad!) bandalarim Mening haqimda so‘rasalar, (ayting) Men ularga yaqinman. Menga iltijo qiluvchining duosini ijobat eturman. Bas, ular ham Meni (da’vatlarimni) ijobat (qabul) etib, Menga imon keltirsinlar, shoyad (shunda) to‘g‘ri yo‘lga tushib ketsalar» (Baqara surasi, 186-oyat).
«Ey Rabbimiz! Biz o‘zimizga (o‘zimiz) zulm qildik. Agar bizni kechirmasang va bizga rahm qilmasang, biz, albatta, ziyon ko‘ruvchilardan bo‘lib qolurmiz» (A’rof surasi, 23-oyat).
«Rabbim! Men Sendan o‘zim (yaxshi) bilmagan narsani so‘rashimdan panoh tilayman. Agar meni kechirmasang va menga rahm qilmasang, albatta, ziyon ko‘ruvchilardan bo‘lib qolurman»(Hud surasi, 47-oyat).
«Ey Rabbim, bu buzg‘unchilar qavmi ustidan O‘zing meni g‘olib qil!» (Ankabut surasi, 30-oyat).
«Ey Rabbim! Meni va zurriyotimdan (ko‘p farzandlarimni) namozni barkamol ado etuvchi qilgin! Ey Rabbimiz! Duoimni qabul et! Ey Rabbimiz! Hisob-kitob qilinadigan (qiyomat) kuni meni, ota-onamni va (barcha) mo‘minlarni mag‘firat qilgin!» (Ibrohim surasi, 40–41-oyatlar).
«Ey osmonlar va Yerni ijod etgan Zot! Dunyoyu oxiratda O‘zing egamdirsan. (Ajalim yetganida) musulmon holimda vafot ettir va meni solihlar (qatori)ga qo‘shgin!» (Yusuf surasi, 101-oyat).
«Tavakkulni Allohga qildik. Ey Rabbimiz! Biz bilan qavmimiz o‘rtasida haqqoniy hukm qil! Sen hukm qiluvchilarning yaxshisidirsan» (A’rof surasi, 89-oyat).
«Ey Rabbim! (Bu qiyin vazifaga) bag‘rimni keng qilgin va ishimni oson qilgin hamda tilimdan tugunni (duduqlikni) yechib yuborgin, (toki) ular (qavmim) gapimni (yaxshi) anglasinlar» (Toho surasi, 25–28-oyatlar).
«Ey Rabbim! O‘zing menga (bu) zolimlar qavmidan najot bergin!» (Qasas surasi, 21-oyat).
«Sendan o‘zga iloh yo‘qdir. Sen (barcha) nuqsonlardan pokdirsan. Darhaqiqat, men (o‘zimga) zulm qiluvchilardan bo‘ldim» (Anbiyo surasi, 87-oyat).
«Ey Rabbim! Meni yolg‘iz tashlab qo‘yma (merosxo‘r farzand ato et!) Sen (O‘zing) vorislarning yaxshirog‘idirsan»(Anbiyo surasi, 89-oyat).
«Rabbim, menga (ham) o‘z huzuringdan pok zurriyot ato et! Darhaqiqat, Sen duoni eshituvchidirsan» (Oli Imron surasi, 38-oyat).
«Ey Rabbimiz, bizni hidoyat yo‘liga solganingdan keyin dillarimizni (to‘g‘ri yo‘ldan) og‘dirma va bizga huzuringdan rahmat ato et! Albatta, Sen Vahhob (barcha ne’matlarni tekin ato etuvchi)dirsan» (Oli Imron surasi, 8-oyat).
«Ey Rabbim! Meni (qabrga) sodiqlik bilan (gunohlarim kechirilgan holimda) kiritgin va (tiriltirganingda ham) sodiqlik (roziliging bilan) chiqargin hamda men uchun o‘z dargohingdan bir madad beruvchi hujjat ato qilgin» (Isro surasi, 80-oyat).
«Ey Rabbim! Menga (kofirlarga) va’da qilinayotgan narsa (azob)ni ko‘rsatsang-chi?! Ey Rabbim! (o‘shanda) meni u zolimlar qavmi ichida (turuvchi) qilmagin!». «Ey Rabbim! Men Sendan shaytonlarning vasvasalaridan panoh berishingni so‘rayman. Yana men Sendan, ey Rabbim, ular mening huzurimga kelishlaridan panoh so‘rayman». «Ey Rabbim! (Gunohlarimizni) mag‘firat et va (holimizga) rahm ayla! Sen (o‘zing) rahm qiluvchilarning yaxshisidirsan». (Mu’minun surasi, 93,-94-,97-,98-,118-oyatlar).
«Ey Rabbim! Menga ilmni ziyoda et!» (Toho surasi, 114-oyat).
«Ey Rabbimiz, bizlar Senga imon keltirganmiz. Bas, bizning gunohlarimizni kechir va bizni do‘zax azobidan asra!»(Oli Imron surasi,16-oyat).
Markazni bunyod etishda ishtirok etish — katta ishonch va mas’uliyatdir!
11.04.2025
3495
1 min.
O‘zbekiston xalqaro islom akademiyasida Markaz ekspozitsiyasining diniy-ma’rifiy yo‘nalishdagi ilmiy-innovatsion loyihalariga bag‘ishlangan muhokama o‘tkazildi. Unda mamlakatimizda diniy-ma’rifiy yo‘nalishda faoliyat yuritayotgan tashkilotlar vakillari, olimlar va Markaz xodimlari ishtirok etdi.
Uchrashuvda mas’ullar Markaz kutubxonasi fondini mahalliy va xorijiy nashriyotlarda chop etilgan diniy-ma’rifiy, ilmiy-ommabop, zamonaviy adabiyotlar bilan boyitish bo‘yicha fikr-mulohazalarini bayon etdi. Muhokama markaziga diniy-ma’rifiy yo‘nalishdagi eksponatlarning mazmuni, ma’lumotlarning asosli ekanligi, ularni boyitish va takomillashtirish bo‘yicha ilmiy-tadqiqot markazlaridan mutaxassislarni jalb etish, buyuk ajdodlarimizning madaniy meroslarini ommalashtirish maqsadida ularning ilmiy-ma’rifiy asarlarning qo‘lyozma va nashr nusxalari qo‘rgazmasini tashkil etish bo‘yicha takliflar bildirildi.
Yangi O‘zbekistonda amalga oshirilayotgan diniy-ma’rifiy yo‘nalishdagi islohotlar haqida iliq fikrlar aytildi. O‘zbekistondagi xalqaro Islom akademiyasi rektori Markaz ekspozitsiyasini tashkil etishda samarali ishlar amalga oshirilayotgani haqida so‘z yuritdi:
— O‘zbekistondagi Islom sivilizatsiyasi markazi ekspozitsiyasi bo‘yicha oldimizga ustuvor vazifalar qo‘yilgan edi. Shu topshiriqlar asosida sohalar kesimida samarali ishlar qilinmoqda. Bunda Markaz ekspozitsiyasini boyitishda zamonaviy yondashgan holda ishlar olib borilmoqda. Bunda nodir kitoblar va qo‘lyozmalar ro‘yxati shakllantirilmoqda. Sohaviy yangiliklar va keng jamoatchilikka ma’lum bo‘lmagan manbalarni ekspozitsiya uchun taqdim etishni rejalashtirganmiz. Umuman olganda, Markaz bunyod etilishida hissa qo‘shish – bu katta ishonch va mas’uliyatdir!
Uchrashuvda, shuningdek, Markaz katta ilmiy xodimi Abdushukur Muratov loyihalar bo‘yicha olib borilayotgan ishlar haqida o‘z ma’ruzasi bilan qatnashdi, hamkorlar, diniy-ma’rifiy yo‘nalishda viloyatlarda faoliyat yuritayotgan tashkilotlar va hamkorlar onlayn ishtirok etib, mavzu doirasida fikr-mulohazalarini bildirib o‘tdi.
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
