Shu yil 25 yanvar' kuni O'zbekiston musulmonlari idorasi raisi o'rinbosari, Toshkent Islom instituti rektori Muhammadolim Muhammadsiddiqov, Din ishlari bo'yicha qo'mita boshqarma boshlig'i Muhiddin Hakimov va Diniy idora bo'lim mudiri Muzaffar Kamolov va institutning Modul' ta'lim tizimi talabalari bilan ochiq muloqot o'tkazildi.

Tadbirni rektor Muhammadolim domla kirish so'zi bilan ochib, Modul' ta'lim tizimi faoliyati, o'quv dasturlari, o'tilayotgan fanlar va tashkiliy masalalar yuzasidan ma'lumot berdi.

Soha mas'ullari hozirda institutda ta'lim olayotgan 360 dan ziyod masjid xodimi bo'lgan talabalar bilan muloqotda ularning o'qishi, darslarda qatnashishi, ularga yaratilgan sharoitlar, shartnoma to'lovlari, darslar bilan uzviy davom etayotgan imomlik faoliyatlari borasida o'zaro fikr almashildi.

Ma'lumot o'rnida Toshkent islom institutida 2019-2020 o'quv yilidan boshlab o'rta maxsus ma'lumotga ega imom-xatib va imom noiblarni oliy ma'lumotli kadrlar qilib tayyorlash maqsadida Modul' ta'lim tizimi joriy qilingan.

Modul' ta'lim tizimiga abituriyentlarni O'zbekiston musulmonlari idorasining Qoraqalpog'iston Respublikasi qoziyoti va viloyatlar vakillari tavsiya etadi. Ular masjiddagi ish faoliyatidan ajralmagan holda 3 yil mobaynida to'lov-shartnoma asosida tahsil oladi.

Bu tizimga O'zbekiston musulmonlari idorasi tasarrufidagi o'rta maxsus islom ta'lim muassasalarini tamomlagan, 4 yil va undan ortiq muddat davomida Diniy idora tizimidagi masjidlarda faoliyat olib borayotgan imom-xatib va imom noiblari imtihon asosida o'qishga qabul qilinadi.

Modul' ta'limi uchun oliy ma'lumotli diniy kadrlarga bo'lgan ehtiyojdan kelib chiqib viloyatlar kesimida kvotalar ajratilgan.
Viloyatlarga ajratilgan kvotaga ko'ra eng yuqori ball to'plagan 60 nafar imom-xatib va 60 nafar noib imom jami 120 nafar abituriyent Oliy Ma'had talabasi bo'ladi.

Toshkent Islom instituti
Matbuot xizmati