Muslim.uz saytining fidoyi xodimlari bugundan e’tiboran Islom dinining besh ustunidan biri bo‘lgan namoz o‘qishning tartib-qoidalarini Hanafiy mazhabi bo‘yicha tushunarli qilib, matnli va ovozli shaklda taqdim etib boradilar. Har bir ovozli audio mp3 shaklda tayyorlangan, ko‘chirib olib foydalanishingiz mumkin (tijoriy maqsadda foydalanish taqiqlanadi).
Shuningdek, imon va islom shartlari, Allohning sifatlari, masjid odoblari, tahorat, g‘usl tayammum tartiblari, eng fazilatli duolar haqida qisqa va muhim ma’lumotlar taqdim etiladi. Ushbu ma’lumotlar “Movarounnahr” nashriyoti tomonidan chop etilgan “Men ham namoz o‘qiyman” nomli kitobi asosida tayyorlandi. 
Alloh taboraka va taolo ushbu xayrli ishni muvaffaqiyatli va mo‘min-musulmonlarimiz uchun manfaatli qilsin.

O‘zbekiston musulmonlari idorasi Matbuot xizmati

SO‘ZBOSHI

Mo‘min-musulmonlarga bir kunda besh mahal namozni farz qilgan va: «Namozni barkamol o‘qingiz...» (Baqara surasi, 43-,110-oyatlar) deya amr etgan Alloh taologa O‘zining ulug‘ligi va qudraticha, dunyo yaralganidan to qiyomatgacha imon keltirgan barcha bandalar tomonidan o‘qiladigan barcha namozlar rakatlari adadidan ham ortiq, har bir ruku, barcha sajdalarda aytiladigan tasbehlar miqdoridan ham karrot-karrot ko‘p hamdu sanolar bo‘lsin. Muborak hadisi shariflarida namozga: «Jannatning kaliti», «Dinning ustuni», «Mo‘minning me’roji», deya juda chiroyli ta’rif bergan, ummatlarini ushbu ibodatni barkamol ado etishga hamda: «Mening namoz o‘qiganimni ko‘rganingizdek sizlar ham namoz o‘qingiz» (Imom Buxoriy rivoyati), degan suyukli Payg‘ambarimiz, olamlar sarvari Muhammad mustafo (sollallohu alayhi va sallam)ga hadsiz, hisobsiz durudu salavotlar bo‘lsin. Islom dinining bizgacha bekamu ko‘st yetib kelishida juda katta hissa qo‘shgan, Rasululloh (sollallohu alayhi va sallam)dan eshitgan har bir so‘zni, hadisni xotirasiga jo aylab, juda katta mas’uliyat va yagona maqsad – Alloh rizosi uchun keyingi avlodlarga yetkazgan sahobalarga, tobeinlarga, tabaa tobeinlarga, muhaqqiq ulamolarga Allohning rahmati va mag‘firati bo‘lsin. Namoz shunday ibodatki, undagi lazzat, rohat, farog‘at, huzur-halovat, xotirjamlikni so‘z bilan ta’riflash juda qiyin. Ta’bir joiz bo‘lsa, banda sajdaga bosh qo‘yib, o‘zining ojizligiyu Buyuk Yaratuvchining qodiri mutlaqligini eslash bilan tuyiladigan ma’naviy lazzatni boshqa biror holatda tuyish mushkul.

Darhaqiqat, saodat kaliti – namozning foydalari bisyor. Zotan, Alloh taolo buyurgan har bir amal bandalar uchun koni foydadir. Ularda ko‘plab hikmatlar yashiringan. Alloh amrlariga amal qilgan kishi ko‘nglida ixlos ila ikki dunyo saodatidan umidvor bo‘lsa, rag‘batu mukofot olishi muqarrar. Namoz – odamni ham jismoniy, ham ruhiy jihatdan chiniqtiradigan ibodat. Poklanish jarayoni – tahoratdan to namozning harakatu qoidalari: takbir, qiyom, ruku, sajda, jalsa va taslim — bularning barchasi Allohning bandalariga benazir in’omi, buyuk tuhfasidir. Shunday ekan, bu amallarni so‘zda emas, balki chin ixlos bilan amalda bajarsakkina, ulkan foydalarga erishamiz. Namozning ma’naviy foydalari – savobini esa Alloh taolo niyatimizga, ixlosimizga yarasha ko‘paytirib beraveradi. Muhtaram mo‘min-musulmonlar! Yurtimizda toat-ibodatlar Imomi A’zam – Abu Hanifa No‘mon ibn Sobit (rahmatullohi alayh) asos solgan hanafiy mazhabida ado etiladi. Shu bois, ibodatlarni hanafiy mazhabi qoidalariga qat’iy rioya qilgan holda ado etsangiz, turli fitnalarning oldini olishga hissa qo‘shib, ulkan ajrlarga ega bo‘lgan bo‘lasiz, inshoalloh.

Ushbu kitob, inshoalloh, Alloh taolo amriga bo‘ysungan, Rasuli muhtaram Muhammad Mustafo (sollallohu alayhi va sallam)ningko‘rsatmalariga rioya qilishni ich-ichidan istayotgan mo‘min-musulmonlar uchun toat-ibodatlarni bekamu ko‘st ado etishlarida juda zarur qo‘llanmadir. Hozir yurtimizda el-yurt manfaati, xalq

farvonligini ko‘zlab barcha sohalarda ulkan islohotlar, bunyodkorlik va obodonlashtirish ishlari avj olgan. Besh vaqt namozlardan so‘ng mamlakatimizda tinchlik-osoyishtalik barqarorligini, xayrli ishlar bardavomligini so‘rab, Alloh taologa duo-iltijolar qilish nur ustiga nur bo‘ladi.

Usmonxon ALIMOV,

O‘zbekiston musulmonlari idorasi raisi,

muftiy