Muftiy hazrat AQSH Tinchlik institutida nutq so‘zladi
Avval, O‘zbekiston musulmonlari idorasi raisi, muftiy Usmonxon Alimov hazratlari AQSHga jo‘nab ketganlari haqida xabar bergan edik.
21 may kuni Vashington shahrida muftiy Usmonxon Alimov hazratlari AQSH Tinchlik institutida tashkil etilgan davra suhbatida nutq so‘zladilar. Muftiy hazratlari muhtaram Prezidentimiz rahbarliklarida mamlakatimizda barcha sohalar qatori diniy-ma’rifiy va e’tiqod erkinligi borasida ham ulkan islohotlar amalga oshirilayotganini bildirib, masjidlar soni 2056 tani, diniy ta’lim muassasalari soni 12 tani tashkil etgani, Ramazon oyida barcha masjidda taroveh namozlari, 1250 ta masjidda esa xatmi Qur’onlar o‘tkazilayotgani hamda AQSH, Rossiya va Malayziya kabi davlatlar takliflar asosida qorilarimiz mazkur davlatlarda taroveh namozlarida xatmi Qur’on o‘qishayotgani haqida ma’lumot berdilar.
Shuningdek, o‘lkamizda 12 ta diniy ta’lim muassasasi faoliyat olib borayotgani, bularning 3 tasi oliy, 9 tasi o‘rta maxsus, 2 tasi ayol-qizlar bilim yurti ekanini bildirdilar. O‘tgan yillarda Prezidentimiz tashabbuslari bilan Mir Arab oliy madrasasi va Hadis ilmi maktabi nomli ikkita oliy diniy ta’lim muassasasi tashkil etilganini so‘zlab berdilar.
2018 yili diyorimizda 13 ta yangi masjid ochildi, joriy yil esa davlatimiz Rahbarining bevosita tashabbusi bilan ikkita muhtasham jome masjidning ochilish marosimi bo‘lganini alohida qayd etdilar.
Bundan tashqari muftiy hazratlari yurtimizda jaholatga qarshi ma’rifat bilan kurashishning ahamiyati va turli diniy konfessiyalar vakillari bilan azaldan ahil-inoq yashashning tinchlik-barqarorlikka ijobiy ta’siri juda katta ekanini muftiy hazratlari izohladilar.
Davra suhbati ishtirokchilari – ekspertlar, tahlilchilar va soha mutaxassislari tomonidan O‘zbekistondagi “Jaholatga qarshi ma’rifat bilan kurashish" tamoyili juda iliq qarshi olindi va amalga oshirilayotgan ilohotlarga yuqori baho berildi.
O‘zbekiston delegatsiyasi tarkibidagi Oliy Majlis a’zolari – Senat Tashqi ishlar qo‘mitasi raisi Alisher Kurmanov va Qonunchilik palatasi a’zosi, Inson huquqlari milliy markazi direktori Akmal Saidov hamda O‘zbekistondagi Islom sivilizatsiyasi markazi direktori Shoazim Minovarov ham davra suhbatida so‘zga chiqishdi va e’tiqod erkinligi borasidagi savollarga batafsil javob berishdi.
Ushbu tadbir O‘zbekistonning AQSHdagi elchixonasi va AQSH Tinchlik instituti tomonidan tashkil etildi. 20 may kuni Tinchlik instituti tomonidan tadbir ishtirokchilari uchun iftorlik ham uyushtirildi.
AQSH safari davom etmoqda, jarayonlarni saytimiz orqali yoritib boramiz.
O‘zbekiston musulmonlari idorasi Matbuot xizmati
Xalqaro forum oldidan matbuot anjumani o‘tkazildi
Bugun O‘zbekistondagi Islom sivilizatsiyasi markazida yurtimizda 7-11 iyul kunlari o‘tkaziladigan “Islom sivilizatsiyasi: tinchlik, bag‘rikenglik va ilm-ma’rifat yo‘li” mavzusidagi I Xalqaro Islom sivilizatsiyasi forumi yuzasidan matbuot anjumani bo‘lib o‘tdi.
Anjumanda Islom sivilizatsiyasi markazi direktori Firdavs Abduxoliqov, Din ishlari bo‘yicha qo‘mita raisining birinchi o‘rinbosari Davronbek Maqsudov, Imom Moturidiy xalqaro ilmiy-tadqiqot markazi direktori Komiljon Shermuhamedov, ISЕSKO rahbari Salim Muhammad hamda xalqaro al-Furqon jamg‘armasi raisi Sali Shahsuvariy so‘zga chiqdi.
Matbuot anjumanida mazkur nufuzli tadbirning maqsad va vazifalari, uning xalqaro ahamiyati hamda forum doirasida rejalashtirilgan ilmiy-ma’rifiy tadbirlar haqida ma’lumot berildi.
Ta’kidlanganidek, Toshkent, Samarqand va Termiz shaharlarida o‘tkazilayotgan forumda dunyoning turli mamlakatlaridan taniqli ulamolar, muftiylar, islomshunos olimlar va xalqaro tashkilotlar vakillari ishtirok etadi.
Ushbu forum islom dinining tinchlik, bag‘rikenglik, ilm-ma’rifat va insonparvarlikka asoslangan asl mohiyatini xalqaro jamoatchilikka yetkazishda muhim ahamiyat kasb etishi ta’kidlandi. Shu bilan birga, mazkur anjuman O‘zbekistonning islom sivilizatsiyasi rivojidagi tarixiy o‘rni, buyuk allomalar merosi va ma’rifiy an’analarini dunyo miqyosida yanada keng namoyon etishga xizmat qilishi alohida qayd etildi.
Ma’lumot o‘rnida, shu yil 7–8 iyul kunlari Toshkentdagi Islom sivilizatsiyasi markazida konferensiyalar bo‘lib o‘tadi. 9–10 iyul kunlari esa Samarqand va Termiz shaharlarida Imom Buxoriy, Imom Moturidiy va Imom Termiziyning ilmiy-madaniy merosiga bag‘ishlangan xalqaro konferensiyalar tashkil etiladi.
Forum doirasidagi bunday uchrashuv va muhokamalar ilm-fan, dinlararo muloqot, bag‘rikenglik va ma’rifat tamoyillarini mustahkamlashda muhim amaliy maydon vazifasini bajaradi.
O‘zbekiston musulmonlari idorasi
Matbuot xizmati
- «
- »