Islom dinimizda ilmga qattiq e’tibor berilgan va unga targ‘ib etilgan. Ilm o‘rganish har bir musulmon erkak va muslima ayolga farz deb e’lon qilingan.
Inson hayotda to‘g‘ri yo‘lni ilm orqali topa oladi.
Buyuk vatandoshimiz Imom Buxoriy rahimahullohning “Ilmdan boshqa najot yo‘q” degan gaplarida ulkan ma’no bor.
Ilm – sarf etilgani sari tugamaydigan, aksincha oshib, mustahkamlanib boradigan noyob ne’matdir. Molu dunyo esa ishlatilgani sari tugab boraveradi.
Qur’oni Karimda Alloh taolo iymonli olimlarning martabalarini baland qilishini, O‘zidan bandalari orasida olimlar ko‘proq qo‘rqishini aytgan.
Hadisi shariflarda ilm o‘rgatuvchilarning haqqiga hamma narsa, hatto dengizdagi baliqlar, inidagi chumolilar ham istig‘for aytishi ta’kidlangan.
Banda ibodatini ham faqat ilm asosida ado etadi. Chunki qanday namoz o‘qish, qanday ro‘za tutish, qanday zakot berish va qanday haj qilish ilm orqali o‘rganiladi.
Olimlar, muallimlarning martabalari bu dunyoda ham, oxiratda ham baland bo‘ladi.
Endi yuqoridagi rasmga izoh bersak: bu avtobus Meksikada bo‘lib, uning yarmi maktab avtobusi ko‘rinishida, yarmi esa qamoqxona avtobusi ko‘rinishida bo‘yalgan. Yoniga “Ta’lim boshlangan joyda zo‘ravonlik, bezorilik tugaydi” deb yozib qo‘yilgan.
Nozimjon Iminjonov
Hazorasp tumanida yangidan qurib bitkazilgan “Hazrati Shayx Muxammad Amin” jome masjidining ochilish marosimi o‘tkazildi. Unda Xorazm viloyati bosh imom-xatibi Xayrulla domla Abdullayev, Hazorasp tumani hokimi Maqsudbek Abdullayev, shahar-tuman bosh imom-xatiblari va masjid imom-xatiblari, mahalla ahli jam bo‘lishdi.
Qur’oni karim tilovatidan so‘ng masjidning to qiyomatgacha Haq taologa ibodat qilinadigan sajdagoh bo‘lishini, xalqimiz e’tiqodi, ma’rifatini mustahkamlashda hidoyat va ziyo maskani bo‘lib xizmat qilishini so‘rab, bu xayrli ishga ko‘makchi bo‘lgan barcha ezgu niyatli kishilar haqiga duolar qilindi.
Ma’lumot o‘rnida zamonaviy talablarga javob beradigan, barcha qulayliklarga ega bo‘lgan mazkur masjid 1600 nafar namozxonga mo‘ljallangan.
O‘zbekiston musulmonlari idorasi
Xorazm viloyati vakilligi
Matbuot xizmati