Mino Makka va Muzdalifa oralig‘idagi qishloqning nomi bo‘lib, u Masjid al-Haram shimolidan 7 km uzoqlikda joylashgan. Ibrohim alayhissalom shu yerda shaytonga tosh otganlar va qurbonlik qilganlar. Rasululloh sollallohu alayhi va sallam ham vidolashuv hajini ado etganlarida tosh otib, qurbonlik so‘yganlar. Va: “Mana shu yerda qurbonlik qildim. Minoning barcha yerida qurbonlik so‘yilur”, deganlar. 

Hojilar Zulhijja oyining sakkizinchi kuni bomdod namozini ado etib bo‘lgach, Minoga yo‘l oladilar va Arafa kunining bomdod vaqtigacha shu yerda istiqomat qiladilar. So‘ngra Arafotga ketib, Zulhijja oyining o‘ninchi kuni yana Minoga qaytadilar va ikki kun shaytonga tosh otishni davom ettiradilar.

Yurtimizdan jo‘nab ketgan hojilar ham Nabiy alayhissalomning sunnati saniyyalariga amal qilish niyatida shunday ulug‘, muborak maskanga yo‘l oldilar. Bu yerda ibodatning mag‘izi bo‘lgan duo bilan mashg‘ul bo‘lib, yurtimiz, xalqimiz tinchligi va farovonligi so‘rab duolar qiladilar.

Alloh taolo hojilarimizning duolar maqbul bo‘ladigan lahza va makonlarda qilayotgan duoi-xayrlarini qabul etsin. So‘raydiganlaridan afzalini bersin.

O‘MI matbuot xizmati