Alloh taologa beadad hamdu sanolar bo‘lsinki, nihoyat oylarning sultoni, Qur’on oyi bo‘lmish muborak Ramazoni sharif o‘zining tarovati, saxovati va barakoti bilan tashrif buyurdi.

Alloh taolo Ramazon oyini boshqa oylardan afzal qildi. Uni ko‘plab fazilat va imtiyozlar bilan xosladi. Ibn Abbos roziyallohu anhumodan rivoyat qilinadi: «Nabiy sollallohu alayhi vasallam: “Oylarning eng afzali Ramazon oyidir”, –dedilar». (Imom Tabaroniy rivoyati).

Bu oyda olam shodlikka to‘ladi, farishtalar yer yuziga tushadi, xayr-baraka, fazilat va barakalar yog‘iladi. Mo‘minlarning qalbida surur, ko‘zida quvonch balqiydi. Hamma bir-biri bilan shirinso‘z bo‘lib, mehr-muhabbat oshadi, savob to‘plash ilinji ortadi, ibodatga bo‘lgan ishtiyoq kuchayadi.

Fazilatda tengi yo‘q bu muborak oyda jannat eshiklari, rahmat eshiklari ochiladi. Do‘zax eshiklari yopiladi, shaytonlar kishanlanadi.

Ro‘za tutishi farz bo‘lgan barcha musulmonlar unga doir bilimlarga ega bo‘lishlari lozimdir. Ro‘zaning bir necha turi bo‘lib, ular orasida tutilishi harom bo‘lgan ro‘za ham mavjud. Bu turdagi ro‘zani hanafiy mazhabida “makruhi tahrimiy” ham deyiladi. Bular qo‘yidagilardan iborat.

1. Ayol kishining erining iznisiz yoki roziligini bilmay turib nafl ro‘za tutishi.
2. Shak kuni ro‘za tutish ya’ni Sha’bonning oxirgi kuni.
3. Ro‘za hayiti kuni, Qurbon hayiti kuni va undan keyingi uch kunning ro‘zasini tutish.
4. Hayzli va nifosli ayolning ro‘za tutishi.
5. Ro‘za tutsa halok bo‘lishini bilib turib ro‘za tutgan odamning ro‘zasi.

Bunga dalil,  Abu Hurayradan rivoyat qilingan hadisda: “Rasululloh sollallohu alayhi vasallam ikki kunning – Azho va Fitr kunining ro‘zasidan qaytardilar.”

 Shuningdek, Imom Ahmad va Imom Muslimdan rivoyat qilinadi, Nabiy sollallohu alayhi vasallam: “Tashriq kunlari yeb-ichish va Allohning zikri kunlaridir” dedilar.

Bundan ma’lum bo‘ladiki mazkur holat va kunlarda ro‘za rutish muqaddas dinimizda qaytarilgan ish bo‘lib, bu haqda ma’lumotga ega bo‘lish manfa’atdan xoli emas.

Parvardigori olam bu yilgi Ramazonda  ko‘plab xayr-barakalarni yog‘dirsin. Bu muborak oyning sharofatidan yurtimizga tinchlik-xotirjamlik, xalqimizga farovonlik, dasturxonimizga to‘kin-sochinlik ato aylasin.

Xadichai Kubro ayol-qizlar o‘rta maxsus

islom bilim yurti mudarrisasi

Shahlo Sayidova