2014 yili Yorqinjon domla bilan birga Buxoroga safar qildik. U yerda kechki payt tunab qolish uchun Masjidi Kalon yonidagi mehmonxonaga joylashdik. Kechki payt buxorolik talabalar bizni bomdod namoziga Buxoroning yetuk qorilaridan biri Abdulbosit qori aka imomlik qiladigan masjidga borishimizni, u yerda qori aka o‘zi namozga o‘tib go‘zal qiroat qilib berishini aytishdi. 

Biz erta tongda turib o‘sha masjidga boramiz deb harakatga tushdik. Hamma tahorat olib tayyorgarlik ko‘rdi, lekin Yorqinjon domla bir ish bilan band bo‘lib qolib, yaqinroqdagi boshqa masjidga borishimizga to‘g‘ri kelgandi, shu tufayli “Masjidi Kalon”ga chiqdik. 

U yerda jamoat juda oz ekan. Masjidga kirganimizda kiyimi, tashqi ko‘rinishidan hindistonlikka o‘xshash to‘rt musofir ziyoratchi bomdodning sunnatini o‘qib, o‘tirishgan ekan. Biz ham darrov sunnatni o‘qidik, imom yetib kelmagan ekan, meni imomlikka o‘tkazishdi. Namozni tugatib, duo qiling desam, Yorqinjon domla hindistonlik shayxlarga ishora qilgan edilar. Ulardan biri duo qildi. 

Namozdan chiqib u mehmonlar bilan ko‘rishdik. Yorqinjon domla urduchada "Ahvolingiz yaxshimi?" degan edilar. Hind  mehmonlar: “Sen qayerliksan, urdu tilini qayerdan bilasan?” deb so‘rab qolishdi. U kishi Devbandda o‘qiganliklarini aytdilar.
Ular ham o‘zini tanishtirib, biri Hindistonda katta madrasa mudiri va yana biri Janubiy Afrika Respublikasidagi diniy madrasalar tizimi rahbari ekanligini aytdi. Boshqalari ham Hindistonning yirik ulamolari ekan. 

Ular “Bizni malono Rahmatulloh ismli yana bir hamrohimiz bor. U kishi hozir mehmonxonada o‘tiribdi. O‘zbekistonga kelganimizdan beri shayximiz bir talaba haqida so‘rayapti” deyishdi. Domla “U shayx Rahmatulloh Kashmiriymi?” deb so‘ragan edilar, ular: “Ha aynan o‘sha kishi. Sen biz bilan mehmonxonaga borgin, balki shayximiz so‘ragan kishi sendirsan” deyishdi. 

Ular bilan mehmonxonaga kirib bordik. Ichkariga kirsak, zikr qilib o‘tirgan ekan. Mehmonlardan biri eshikdan kirishimiz bilanoq: “Shayx siz izlayotgan o‘zbek talabaning ismi nima edi?” dedi. Shayx orqa o‘girib, qiblaga yuzlanib o‘tirganicha: “Yarqiiin” dedilar. Yorqinjon domla shayxning yoniga borib, qo‘llaridan tutib, yig‘lab: “Men Yorqinman” degan edilar. Shayx ham ko‘rib yig‘lab yubordi. Ular salom alik qilishganidan keyin shayx: “Men Hindistonda samolyotga o‘tirayotganimizda kotibimga telefon qilib, uy manzilingni so‘rab yozib olgandim. Bu yerga kelganimdan beri seni izlayman, oldimga qanday kelib qolding?” degan edi. Yorqinjon domla: “Hazrat bu sizning karomatingiz” dedilar.

U yerda uzoq suhbat qurgandan keyin namozga chiqqan mehmonlar menga “Sen namozda tajvid bilan, chiroyli qiroat qilding, yana o‘qib bergin” deyishdi. Men tomog‘im og‘rib, shamollab turganimni aytgandim. Mavlono Rahmatulloh menga: “Ixlos surasini ixlos bilan o‘qigin” dedilar. Tilovat qildim, mavlono duo qildilar. 
Xayrlashib ikki kundan keyin Samarqandga qaytdik. 

Samarqandda Imom Buxoriy rahmatullohi alayhning qabrlarini ziyorat qilish uchun majmuaga kirayotganda yana to‘satdan mavlono Rahmatulloh Kashmiriy boshchiliklaridagi o‘sha hindistonlik mehmonlar bilan uchrashib qoldik. Shunda mavlono hazrat Yorqinjon domlaga: “Bu yerga qayerdan kelib qolding?” degandilar, u kishi: “Hazrat bu sizning ikkinchi karomatingiz-da” dedilar. U yerda hazrat bilan uzoq suhbatlashdik. U kishi safar asnosidagi ba’zi taassurotlari, xususan, biroz avval majmuadagi masjidda nikoh xutbasi marosimida qatnashib, kelin-kuyovlarga guvohlik qilganlarini aytib berdilar.

Ushbu uchrashuvimizdan bir yil o‘tib, Yorqinjon domla Devband madrasasiga borgandilar. Madrasa yaqinida mehmonxonada turganlarida xodim “Bu yerga yurtimizning katta shayxlardan biri kelgan” deb aytib qolibdi. Yorqinjon domla “U kishi kim?” deb so‘rasalar “Mavlono Rahmatulloh Kashmiriy” debdi. Yorqinjon domla darrov mavlono turgan xonalariga kirib ko‘rishibdilar. Shunda mavlono “Bu yerga qachon kelib qolding, meni yana qanday topding?” deb so‘rasalar, Yorqinjon domla: “Bu sizning uchinchi karomatingiz” degan ekanlar. 

Darhaqiqat, uch safar ham ustoz-shogird bir-birlariga muhabbatlari tufayli to‘satdan ko‘rishib qolishgan. Ular qalban bog‘lanishganda Alloh taolo shunday tarzda uchrashtirgan".

Azhar universiteti magistranti Kamoliddin Usmon suhbatidan
Muhammad Zarif Muhammad Olim yozib oldi