Allohning kalomiga muhabbati yuksak bo‘lgan do‘stlarimizga, Yaratgan Parvardigorning rahmati yog‘ilsin deymiz. Bugun erta tongdan vodiyning eng muxlis bandalari zamini bo‘lgan Namangan viloyati uzra Haq taoloning barakoti va nurlari yog‘ilmoqda, desak ayni haq gapni aytgan bo‘lamiz.
Bugun Namagan shahridagi Nurobod dahasida joylashgan “Imom A’zam” jome masjidida qori yigitlar o‘rtasidagi va Namangan shahridagi “Shodiyona” koshonasida qoriya ayol-qizlar o‘rtasida Qur’on musobaqasining viloyat bosqichi bo‘lib o‘tadi. Ushbu musobaqada respublika bosqichiga chiqish uchun tuman bosqichlarida birinchi o‘rinni qo‘lga kiritgan 16 nafar qori, 11 nafar qoriya jami bo‘lib 27 kishi harakat qiladi.
Shuningdek, ushbu viloyatdagi “Hidoya” o‘rta maxsus islom bilim yurti talabalari o‘rtasida ham Respublika bosqichiga yo‘llanma olish uchun o‘zaro musobaqada bellashadilar. Ushbu Qur’on ziyofatiga tayyorgarlik ishlari juda ham jadal suratda olib borildi.
Chunki, guvoh bo‘layotganimizdek, juda ham katta tayyorgarlik ko‘rilgan. Yoshu qari, erkagu ayol, xullas, barcha Qur’onga muhabbatli kishilar erta saxardan viloyatdagi qorilar musobaqasi o‘tadigan jome masjid va koshonaga jam bo‘lishmoqda.
Rivoyat qilinishicha, Sufyon ibn Uyayna rahmatullohi alayh: “Ilm olish tinglashdan boshlanadi, so‘ngra uni tushuniladi va yod olinadi keyin unga amal qilinadi”, dedilar. Banda Kalomullohni xolis niyat bilan tinglasa, uning qalbiga Alloh taolo nur soladi va to‘g‘ri yo‘lga hidoyat qiladi. Qur’oni karimda marhamat qilinadi: “…Bas, (ey Muhammad!) Mening shunday bandalarimga xushxabar beringki, ular gapni tinglab, so‘ng uning eng go‘zaliga (foydalisiga) ergashadilar. Aynan o‘shalar Alloh hidoyat etgan zotlardir va aynan o‘shalargina aql egalaridir” (Zumar, 17-18).
Demak, inson ibodat niyatida Kalomullohni tinglasa va jim tursa cheksiz ajru mukofotga ega bo‘ladi. Qur’oni karimni eshituvchi, avvalo, qalbini hozirlaydi, ibodatni niyat qiladi, siyratiyu suratida xotirjam bo‘lib, ixlos bilan Allohning kalomiga some’ bo‘ladi. Mana shundagina o‘zi umid qilgan va bunga va’da qilingan ajrlarga erishadi, inshoalloh.
Shunday ekan azizlar, har galgidek Namangandagi qorilar musobaqasi butunlay boshqacha bo‘ladi, inshoalloh. Fursatni boy bermang, so‘z va qalam bilan ifoda qilib bo‘lmaydigan onlarni o‘tkazib yuborman, imkon bo‘lsa borib, bo‘lmasa bizning muslim.uz portali va ijtimoiy tarmoqlarni kuzatib, zavq oling. Barchamizdan Alloh rozi bo‘lsin.

O‘zbekiston musulmonlari idorasi Matbuot xizmati