Alloh taolo marhamat qiladi: “Darhaqiqat, (Biz) Odam farzandlarini (aziz va) mukarram qildik va ularni quruqlik va dengizga (ot ulov va kemalarga) mindirib qo‘ydik hamda ularga pok narsalardan rizq berdik va ularni O‘zimiz yaratgan ko‘p jonzotlardan afzal qilib qo‘ydik” (Isro, 70).
Ma’lumotlarga ko‘ra, dunyoda har yili 2 mln. 700 ming nafarga yaqin kishi odam savdosi qurboniga aylanmoqda. Alloh taolo yaratgan maxluqotlar ichida mukarrami va ulug‘i bo‘lgan insonni ayrim shayton quliga aylangan kimsalar tap tortmay buyum singari sotmoqda, ayovsiz ishlatmoqda, xorlamoqda. Ba’zan yovuzlarcha o‘ldirib yuborishyapti. Aldov yo‘li bilan katta va’dalarni berib chet davlatlarga olib ketilgan ayollar qismati... Norasida bolalar va yoshlar taqdiri... Bunday ayanchli holatlar qalbimizni yaralashi tabiiy.
Odam savdosiga qarshi kurashish bo‘yicha yurtimizda adliya va huquqni muhofaza qilish idoralari xodimlari doim huquqiy targ‘ibot-tushuntirish ishlarini olib bormoqda. Odam savdosi nafaqat bir mamlakat, balki dunyo miqyosida hal qilinadigan dolzarb muammo. Uni bartaraf etish uchun hamjihat bo‘laylik. Akamiz yoki ukamiz, qarindoshimiz yoki qo‘shnimiz, opamiz yoki singlimiz aldovlar, quruq va’dalar qurboniga aylanmasin. Har vaqt ogoh bo‘laylik.
Sharofiddin MUSABOYEV,
Andijon shahridagi
«Abu Hurayra» jomei imom-xatibi
O‘MI Matbuot xizmati
Bugun, 11 noyabr kuni O‘zbekiston musulmonlari idorasida Malayziyaning Tun Xusseyn Onn nomidagi davlat universiteti huzuridagi Islomshunoslik instituti rahbari Xairun Nizam boshchiligidagi delegatsiya bilan uchrashuv o‘tkazildi.
Mehmonlarni O‘zbekiston musulmonlari idorasi raisi o‘rinbosari Muhammadolim domla Muhammadsiddiqov qabul qildi va tashrif bilan qutlab, Diniy idora faoliyati, bo‘limlari, xususan, Ta’lim va ilmiy tadqiqotlar bo‘limi haqida aytib o‘tdi.
Mehmonlar so‘nggi yillarda yurtimizda diniy-ma’rifiy, turizm va boshqa sohalarda bo‘layotgan yangilanishlarni e’tirof etib, Islom sivilizatsiyasi markazi, qayta bunyod etilib, yanada chiroy ochgan Imom Buxoriy majmuasi, Mir Arab, Imom Moturidiy, Imom Termiziy va boshqa diniy oliy ta’lim maskanlari tashkil etilganidan mamnun bo‘lganliklarini aytib o‘tishdi.
Uchrashuvda ta’lim-fan, ilmiy tadqiqot ishlarida o‘zaro hamkorlik qilish, ilmiy-ma’rifiy tajriba almashinuvlarni yo‘lga qo‘yish masalalari haqida so‘z bordi.
Yakunda tomonlar bir-birlariga muvaffaqiyat tilab, esdalik uchun suratga tushib, esdalik hadyalari almashishdi.
O‘zbekiston musulmonlari idorasi
Matbuot xizmati