Sayt test holatida ishlamoqda!
02 Sentabr, 2026   |   20 Rabi`ul avval, 1448
search icon
Avvalgi sayt
ЎЗ РУ EN AR

Toshkent shahri
Tong
04:27
Quyosh
05:50
Peshin
12:23
Asr
17:00
Shom
18:59
Xufton
20:17
Bismillah
02 Sentabr, 2026, 20 Rabi`ul avval, 1448
Avvalgi sayt
#search
 YouTube

Sizmi o‘sha, ul Sarvari koinotim?

09.12.2017   10336   3 min.
Sizmi o‘sha, ul Sarvari koinotim?

Buyuklikni oddiylikdan barpo qilgan,

Oddiy mato – xurmo po‘stin sarpo qilgan,

Ochlikda ham to‘qlikda ham taqvo qilgan,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Orlanmagan miskinlar-la o‘ltirishdan,

Farqlolmagan sizni hatto bir ko‘rishdan,

Qasr emas, qarorgohi oddiy g‘ishtdan,

Sizmi o‘sha ul Sarvari koinotim,

Faqirlaru miskinlarga qo‘sh qanotim?

 

Dasturxonga arpa nonlar xo‘b yarashgan,

Farishtalar bir ko‘ray deb ko‘p talashgan,

Sizni ko‘rgan har qanday ko‘z bir qamashgan,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Ibn Mas’ud yig‘lagandi holingizdan,

Bo‘yra izi chiqqanida yoningizdan,

Lek yupandi, ma’vo jannat joyingizdan,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Qolgan emas sizdan meros, ming-ming teva,

Teva emas, hatto bir juft yostiq, ko‘rpa

Qolgan bo‘lsa, qolgandir-da bir qop arpa,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Sahobalar salobatni sizdan olgan,

Olimlarga ilm sizdan meros qolgan,

Sizsiz ummat bugun bir oz o‘yga tolgan,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

So‘zlaringiz so‘zlar ichra shoh misoldir,

Tinglaganlar tin olarlar, misli boldir,

Dushmanlar ham hayratdadir, hayron loldir,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Nubuvvatga panoh bergan ul ansorlar,

Qilgan edi poyingizga jon nisorlar,

Bugungacha ansor ahli mehmon chorlar,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Mashaqqatga berib bardosh muhojirlar,

Ansorlarga bo‘ldi qardosh, ul  “tojirlar”,

Sabru toqat, qanoatda gul tojdirlar

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Bilol aytgan nido hanuz yangramoqda,

Siyratingiz butun jahon tinglamoqda,

Islom nedir bashar asta anglamoqda,

Sizmi o‘sha, ul Sarvari koinotim,

Faqirlaru miskinlarga qo‘sh qanotim?

 

Sizni ko‘rmay sevdi ushbu qaro ko‘zlar,

Sifatlashga yetmagay bu sanoq so‘zlar,

Mayli, hatto mahshargacha tinmay bo‘zlar,

Sizmi o‘sha, ul Sarvari koinotim

Faqirlaru miskinlarga qo‘sh qanotim?

 

Sayyid Ahmad Mahmud o‘g‘li,

“Sayyid Muhyiddin maxdum” o‘rta maxsus islom bilim yurti aqida fani mudarrisi

Siyrat va islom tarixi
Boshqa maqolalar
Yangiliklar

Dohada «Uzbekistan: Heritage in Motion» ko‘rgazmasi ochiladi

02.09.2026   2998   2 min.
Dohada «Uzbekistan: Heritage in Motion» ko‘rgazmasi ochiladi

2026-yil 3-sentabr kuni Dohadagi Islom san’ati muzeyida O‘zbekiston tarixi va madaniy merosiga bag‘ishlangan «Uzbekistan: Heritage in Motion» ko‘rgazmasi ochiladi. Ekspozitsiya Markaziy Osiyoda islom dini tarqalishidan oldingi davrdan to hozirgi kungacha bo‘lgan tarixiy va madaniy jarayonlarni qamrab oladi hamda 28-noyabrgacha davom etadi.

Loyiha O‘zbekiston Madaniyat va san’atni rivojlantirish jamg‘armasi hamda Islom san’ati muzeyi hamkorligida tashkil etilmoqda. Ko‘rgazma so‘nggi uch o‘n yillikdagi O‘zbekiston tarixini mamlakatning zamonaviy madaniy qiyofasi shakllanishi nuqtayi nazaridan namoyish etuvchi ilk xalqaro ekspozitsiya bo‘ladi.

Ekspozitsiyada Qatar va O‘zbekistondagi yetakchi muzey hamda madaniy muassasalar kolleksiyalaridan namunalar namoyish etiladi. Ular orasida Afrosiyobning mashhur devoriy tasviri, «Katta Langar» Qur’oni, Sharqshunoslik instituti qo‘lyozmalari, Buxoro kulolchilik namunalari, XIX–XX asrlarga oid milliy liboslar, zargarlik buyumlari, ipak matolar va an’anaviy hunarmandchilik asarlari bor.

Ko‘rgazma qadimgi mintaqa tarixi, me’moriy meros, islom sivilizatsiyasining intellektual yutuqlari hamda an’anaviy hunarmandchilik rivojiga bag‘ishlangan to‘rtta tematik bo‘limdan iborat. Unda O‘zbekistonning islom olamida fan, madaniyat va san’at rivojining tarixiy markazlaridan biri sifatidagi o‘rniga, shuningdek, Somoniylar va Temuriylar davri merosiga alohida e’tibor qaratiladi.

Tarixiy meros mamlakatning zamonaviy madaniy rivoji bilan uzviy bog‘liq holda namoyish etiladi. Dekorativ-amaliy san’at, to‘qimachilik va zargarlik an’analariga alohida o‘rin beriladi.

Ko‘rgazma doirasidagi ommaviy dastur ma’ruzalar, mahorat darslari, an’anaviy hunarmandchilik namoyishlari, shuningdek, ikat san’ati va ipak ishlab chiqarishga bag‘ishlangan taqdimotlarni o‘z ichiga oladi. 3–16-sentabr kunlari rassom Davlat Toshev rezidentlik dasturi doirasida mahalliy rassomlar va ko‘rgazma tashrif buyuruvchilari uchun Sharq miniatyurasi hamda «Abrū-Bahor» texnikasiga bag‘ishlangan mahorat darslarini o‘tkazadi. Ishtirok etish uchun oldindan ro‘yxatdan o‘tish talab etiladi.

2017-yilda tashkil etilgan O‘zbekiston Madaniyat va san’atni rivojlantirish jamg‘armasi mamlakatning madaniy merosini asrash va xalqaro miqyosda targ‘ib qilish bilan shug‘ullanadi. Jamg‘arma 17 dan ortiq mamlakatda xalqaro loyihalarni amalga oshirgan va 40 dan ortiq xorijiy madaniyat muassasalari bilan hamkorlik qilgan.

Dohadagi Islom san’ati muzeyi 2008-yilda tashkil etilgan. Muzey kolleksiyasi qariyb 1 300 yillik tarixni qamrab oladi va unda qo‘lyozmalar, kulolchilik buyumlari, metall va shisha mahsulotlari, to‘qimachilik namunalari, gilamlar hamda zargarlik buyumlari mavjud.
O'zbekiston musulmonlari idorasi Matbuot xizmati
 
 
Dunyo yangiliklari
#logo