Kecha, 22 noyabr kuni Surxondaryo viloyati Sho‘rchi tumanidagi masjidlar soni yana bittaga ko‘paydi. Ushbu tumandagi “Tolli ota” jome masjidiga Surxondaryo viloyati Adliya boshqarmasi tomonidan masjid ustavining ro‘yxatdan o‘tkazilgani to‘g‘risida guvohnoma taqdim etildi. Albatta, bu “Tolli” mahallasida istiqomat qiluvchi namozxonlar uchun juda katta tuhfa bo‘ldi, hozirda ularning quvonchi cheksiz.
Ushbu masjidning ochilish marosimi bilan bog‘liq jarayonlar haqida saytimizda batafsil ma’lumot beramiz. Bizni kuzatib boring.
O‘zbekiston musulmonlari idorasi
Matbuot xizmati
Shu yilning 3 iyun kuni O‘zbekiston musulmonlari idorasi tasarrufidagi «Ko‘kaldosh» va «Xoja Buxoriy» o‘rta maxsus islom ta’lim muassasalari talabalari O‘zbekistondagi Islom sivilizatsiyasi markazida bo‘lishdi. Bilim yurti mudarrislari boshchiligida tashkil etilgan ushbu ma’rifiy sayohatdan ko‘zlangan asosiy maqsad yoshlarni yurtimizda diniy-ma’rifiy sohada amalga oshirilayotgan keng ko‘lamli islohotlar va ajdodlarimizning boy ilmiy merosi bilan yaqindan tanishtirishdan iborat bo‘ldi.
Sayohat doirasida markaz mutaxassislari tomonidan talabalar uchun maxsus mahorat darsi tashkil etilib, unda Islom sivilizatsiyasi rivoji, yurt allomalarining jahon ilm-faniga qo‘shgan hissasi va qadimiy qo‘lyozmalar bilan ishlash usullari haqida muhim ma’lumotlar berildi.
So‘ngra talabalar markazda saqlanayotgan noyob qo‘lyozmalar, zamonaviy interaktiv ko‘rgazmalar hamda Imom Buxoriy, Imom Termiziy, Abu Mansur Moturidiy kabi ulug‘ zotlar hayotiga bag‘ishlangan bo‘limlarni katta qiziqish bilan ko‘zdan kechirdilar.
Bu kabi tadbirlar bo‘lajak diniy soha xodimlarini vatanparvarlik, ilmga muhabbat va ajdodlar merosiga sadoqat ruhida tarbiyalashda muhim omil bo‘lib xizmat qiladi.
O‘zbekiston musulmonlari idorasi
Matbuot xizmati