Ramzan Qodirov Prezident Shavkat Mirziyoyev bilan uchrashuvidan mamnun. U ijtimoiy tarmoqda, uchrashuvdan olgan tassurotini quyidagicha bayon qildi.
Assalomu alaykum! Dushanba kuni men O‘zbekiston poytaxti – Toshkentga keldim. O‘zbekistonga va uning poytaxtiga kelishni ko‘p vaqtdan beri dilimga tugib kelayotgan edim. Toshkentda kaminani muhtaram Prezident Shavkat Mirziyoyev qabul qildi. Men Shavkat Miromonovichdan ko‘rsatgan ehtiromi va do‘stona munosabatidan minnatdorman! O‘zbekiston Prezidentining padari buzrukvorim, Checheniston Respublikasining Birinchi Prezidenti, Rossiya qahramoni Ahmadhoji Qodirovni, uning terrorchilik balosiga qarshi samarali kurashganidan juda ham yaxshi xabardorligi men uchun haqiqiy kashfiyot bo‘ldi. Unga bu haqda Imom Buxoriy nomidagi Toshkent islom instituti rektori bo‘lgan, Ahmadhojiga ta’lim bergan, oilamizning yaqin do‘sti – marhum Shayx Muhammad Sodiq Muhammad Yusuf hazratlari so‘zlab bergan ekan. Men ham o‘z navbatida, Ahmadhojining O‘zbekiston va uning xalqini qanchalar otashin muhabbat bilan sevganini so‘zlab berdim.
Biz investitsiya siyosati, sport, madaniyat, iqtisodiy-ijtimoiy sohalarga doir bir qancha masalalar yuzasidan fikr almashdik. Biz O‘zbekiston va Checheniston o‘rtasidagi hamkorlik aloqalarini yangi pog‘onaga olib chiqishga, ushbu hamkorliklarimizni tizimli tarzda muntazam davom ettirishga kelishib oldik.
Men Alloh taolo o‘zbek xalqini Shavkat Miromonovich siymosida o‘z Vatani va xalqini jonidan ortiq sevadigan, o‘zining butun hayotini Ona Vatani istiqboli uchun bag‘ishlashga tayyor bo‘lgan haqiqiy yo‘lboshchi bilan siylaganiga amin bo‘ldim! U O‘zbekistonda siyosiy va iqtisodiy barqarorlikni ta’minlash, mamlakatni yuksak taraqqiy etgan davlatlar qatoriga qanday olib chiqish yo‘llarini juda yaxshi biladi!
Men Shavkat Miromonovichni o‘zi uchun qulay bo‘lgan vaqtda do‘stona tashrif bilan Rossiya-Chechenistonga mehmon bo‘lishga taklif qildim. Prezident, albatta, Grozniyga borishga va’da berdi!
***
Ha darvoqe, shahar ko‘chasidan yurib borar ekanman kutilmagan uchrashuv yuz berib qoldi. Notanish bir ayolning ismimni aytib chaqirgani qulog‘imga chalindi. Darhol to‘xtab unga yaqinlashdim. U ayol – chechen ekan. Toshkentda tug‘ilibdi, shu yerda yashayotgan ekan. U chechen tilida juda ham tiniq gapirardi. Unga onasi ajdodlarimizning tilini puxta o‘rgatgani meni to‘lqinlantirib yubordi.

Dubay shahrida bo‘lib o‘tgan V yoshlar Para Osiyo o‘yinlarida muvaffaqiyatli ishtirok etib, tarixiy natija qayd etgan O‘zbekiston sport delegatsiyasi O‘zbekistonga qaytib keldi.
Delegatsiya a’zolari "Humo" Toshkent xalqaro aeroportida rasmiylar tomonidan tantanali ravishda kutib olindi.
Poytaxtimizdagi Olimpiya shaharchasida V yoshlar Para Osiyo o‘yinlarida yurtimiz sharafini munosib himoya qilgan sportchilar va ularning murabbiylarini taqdirlashga bag‘ishlangan tantanali marosim bo‘lib o‘tdi.
Tantanali tadbir avvalida Oliy Majlis Senati Raisi Tanzila Narbayeva tomonidan O‘zbekiston Respublikasi Prezidentining V yoshlar Para Osiyo o‘yinlarida ishtirok etgan O‘zbekiston sport delegatsiyasi a’zolariga yo‘llagan tabrigi o‘qib eshittirildi.
Shundan so‘ng davlatimiz madhiyasi ijro etildi va rasmiylar tomonidan sportchilar va murabbiylar erishilgan ulkan g‘alaba bilan samimiy tabriklanib, ularning jasorati, matonati va fidoyiligi yuksak e’tirof etildi.
Ma’lumot o‘rnida: O‘zbekiston terma jamoasi ushbu nufuzli musobaqada 99 ta oltin, 57 ta kumush va 41 ta bronza medalini qo‘lga kiritib, 35 ta davlat orasida umumjamoa hisobida 1-o‘rinni egalladi.
Mazkur g‘alaba Yangi O‘zbekiston yoshlarining salohiyati, irodasi va xalqaro sport maydonidagi nufuzini yana bir bor yaqqol namoyon etdi.
Din ishlari bo‘yicha qo‘mita
Axborot xizmati