O`zbekiston musulmonlari idorasi

Bir izlanuvchining hikoyasi

03.04.2017 13992 11 min.

Abu Abdulloh Salmon al-Forsiy (? - 658) – sahoba; Rasululloh sallollohu alayhi vasallamning as'hoblaridan. Asli isfahonlik. Yoshligidan fitratida Haqqa intilish bo‘lgani tufayli haq dinni qidirib safarga chiqqan. Majusiy dinidagi otasidan qochgan. Dastlab nasroniy diniga kirgan, Payg‘ambar alayhissalomning xabarini eshitganidan so‘ng u zotning huzurlariga kelib islom dinini qabul qilgan. Iroq hokimi bo‘lgan kezlarda ham bo‘yra to‘qib sotib, o‘z mehnati evaziga tirikchilik o‘tkazgan; maoshini muhtojlarga sadaqa etgan. Rasuli Akram (sav)dan ko‘plab hadislar rivoyat qilgan.

Salmon FORSIY

Ey aziz! Ichimdagi bu zimiston dunyo qachon yorishadi? Insonlar faqat qora tanli bo‘lgani uchun, faqir holda tug‘ilgani uchun saroylarda qul sifatida sotilayotir? Men Salmon hech qachon bunday adolatsiz dunyoda o‘zimni ozod insondek his eta olmayman. Kelib chiqishim va tanimning rangi ularniki kabi bo‘lmasa ham har doim mazlumlarga o‘zimni yaqin his etaman. Zero, men o‘zimni aslzoda bilan yonma-yon kelganimda dushman, yo‘qsil bilan duchma-duch kelganda bir do‘st kabi his etaman. Shu bois o‘zimni tanitganimda hurriyat otashi bir kuni badanimni kuydirishini so‘zlar, o‘zimni haqiqat istagan bir qul o‘laroq ta’rif etar edim. Bu hislarim meni yangi bir izlanishga yetakladi. Negaki, bunchalar chirkin dunyoda yuz berayotgan nohaqliklarga aslo tomoshabin bo‘lib tura olmas edim.

Menga o‘xshagan qullar har kuni hisobsiz, savol-so‘roqsiz, sababsiz, ulkan ibodatxonalar, obidalarda, saroylar qurilishida og‘ir toshlari ostida ezilib, qonlar ichida jon bermoqda. Qorinni tuydirish ilinjida qirollarning, imperatorlarning xizmatiga kirmoq va ularga itoat etmoq qanday bo‘ladi-da, inonganim elchining, sig‘inganim tangrining mening taqdirimga baxsh etgani bir haqiqat qanday? Yo‘q! Bu ko‘rguliklarim va barcha birodarlarim torgan azoblar (Tangrilar) bizga baxsh etgan taqdir bo‘lishi mumkin emas. Bular to‘yish nimaligini bilmaydigan boylarning chegarasiz istaklarini ta’min etmoq uchun o‘ylab topgan uydirmalaridir. Hech bir tangri o‘zi yaratgan va taqdirini belgilagan bandasini bu qadar shafqatsiz hayot ichida sinamaydi. Yoki men ishongan tangri o‘z otashi bilan faqat boylarni aziz biladimi? Mabodo, olovi o‘chib qolsa, o‘ziga bir foyda keltira oladimi? Buni o‘zi ham bilmaydi! Axir men dunyoga hurligimni yo‘qotib, qullik kishanlari ostida, og‘ir toshlar yara-chaqa qilib yuborgan majruh bir tanani ko‘tarib yurmoq uchun kelmadim-ku!

Cho‘llardan oshdim, saroylardan qutuldim, qullik, horg‘inlik, aziyat, shuvillagan qamchilar zarbi, oyoqqa urilgan zanjirlar, vahshiyona baqirishlar, ko‘z yoshlari, berahmlik... bular mening ozodligimga daxl qila olmaydi. Erkinligim uzoq diyorlarda, otini o‘zim ham bilmaydigan bir makonda. Qayda bo‘lsam ham xuddi tug‘ilgan vaqtimdagi kabi hurligimni yana topaman. Ichimdagi ozodlik uchqunlari yolqinlanib, katta bir vulqon holiga kelmog‘i uchun bir otash istadim. Dovullari qaynagan bu ozodlik orzusi tanamda kundan kunga yolqinlanib borayotgan edi. Ko‘zlarimni ochganim zahoti uzun bir yo‘l ko‘rar edim. Vallohi, tog‘li, darali, bepoyon va uzundan uzun yo‘l. Bu yo‘lni ochmoqqa zo‘r ehtiyojim bor edi. Ammo dardlarimni, iztiroblarimni, xayollarimni baham ko‘radigan asomdan boshqa kimsam yo‘q edi.

Keldim va uni topdim go‘yoki. Bu diyorlar menga yetisha olmagan ozodligimni ko‘rsatgandek bo‘ldi. Bir donishmand tanishimdan (pop) ilm, hikoya, kichik tadqiqotlar, tarixni, o‘qish-yozishni o‘rgandim. U: “Ozodlik qo‘ldan ketib, yana qul bo‘lib qolishing mumkin, biroq bilimni hech kim sendan tortib ola olmaydi”, derdi. U ikki tangriga sig‘inmas, “Yo pulga yo Allohga sig‘inasan”, degan Iso alayhissalomning izidan borar edi. Unga va Isoga inondim va itoat etdim. Har bir insonning tangrisi bo‘lgan buyuk Mavloga qullik idrokim ila bog‘landim. Bu bog‘lanish menga yo‘qotgan hurligimni qabul etmaganim ibodatxonalardan, aslzodalardan tortib olib bergan edi. Men kimsasiz bir musofir edim yoki bir qul, ammo uning dini bularning hech birini sabab qilib meni quyida ko‘rsatmadi.

Qo‘lga kiritgan hurligim tatimayotgan, shu qadar farahbaxsh tuyg‘udan sarmast bo‘la olmayotgan edim. Chunki hali men kabi minglarcha mazlumlar eng og‘ir sharoitlarda hayot kechirib, zolimlarning zulmi ostida ezilayotgan edi. Bu holni fir’avinlar zulmiga uchragan Musoning as'hobiga mengzash mumkin edi. Ammo mazlumlar haqqini himoya qilish uchun hech bir inson harakat qilmayotgan edi. Aksincha, men yangi mansub bo‘lgan din odamlari o‘z dinlariga oid bo‘lmaganlar (atrof o‘lkalar) bilan g‘avg‘oga kirishgan edi. Muttasil fath harakatlari va urushlar davom etardi. Insonlar yanada vahshiylashgan va Isoning nasihatlarini unutar holga kelgan edi.

Har ishga qodir bo‘lgan tangrining bizlarga baxsh etgan taqdiri faqat achchiq azoblardan iborat bo‘lmoqda edi. Menga hurriyat yo‘lini ko‘rsatgan ruhoniy hayotdan ko‘z yumgan va kuchli iztirob ila meni yolg‘iz tashlab ketgan edi. Uning o‘limi ozodligimning nihoyasi bo‘ldi. Ojiz tanim yana qul o‘laroq xizmat qilishga mahkum etildi.

Ruhoniyning o‘limidan so‘ng bir musofirning emin-erkin yurishi aslzodalarning ko‘ziga milliy qadriyatlarga va nasroniylikka zid harakat o‘laroq qabul etildi. Takror qul bo‘lishim, og‘ir toshlarni tashishim, qamchilar zarbini tortishim, aziyatlar ostida qolishim ayon bo‘lib qoldi. Ruhimdagi hurriyat otashidan ungan novdalarni zolimlar burda-burda qildi. Hamma narsadan umidimni uzdim. Cho‘l endi menga Erondan Kisroning qochganim kabi uzun ko‘rinmas, bu yerlarda bir vaqtlardagi umidlarimni ham ko‘rmas edim.

Muhtasham saroylar, ibodatxonalar, havoga bo‘y cho‘zgan obidalar yana mening ustimdan, to‘kkan terlarim hisobidan yuksalayotgan edi. Ammo pop menga o‘rgatgan o‘qish va yozish menga birmuncha yengillik tug‘dirar edi. Pop menga: “Bu hududlarda arab bir payg‘ambar keladi, uning diniga kir va uning dining vorislaridan bo‘l”, degan edi. Ismi Mustafo emish. U – Alloh tarafidan yer yuziga tushirilgan bir nur, haqiqatni bildiradigan, botilni taqiqlaydigan, odobsizlikka bo‘yin egmaslikni o‘rgatadigan yo‘lboshchidir. Kim bu payg‘ambar? Nima uchun pop menga o‘zi ishongan Isoni va Tangrini qo‘yib, boshqasi ko‘rsatgan bir dinga kirishimni istayotir?..

So‘radim, izladim va tingladim. U Makkadagi Hoshim o‘g‘illari qabilasiga mansub Muhammad ibn Abdulloh emish. U hali tug‘ilmasidanoq otasidan ayrilgan ekan va kichik yoshida onasining ham hasartida qolibdi. Shu kunlarda Madinaga ko‘chish uchun tayyorgarlik ko‘rayotgani haqida eshitdim. Har kim uning yolg‘ondan qochib haqiqatga, botildan qochib vahdatga, zulmga to‘siq bo‘lib adolatni ta’min etmoqqa jahd etgan bir inson ekanini so‘zlayotgan edi. Bu yerdagi qulligimdan qochib zudlik bilan Muhammadni topmoqni istar edim. Mo‘tabar elchining bu yo‘lida unga yo‘ldoshlik qilib zulm sari ketgan har bir yo‘lga g‘ov bo‘lmoqni orzu etdim.

Qochdim va Makkaga keldim. Bu yerda har kishi u haqida so‘zlardi; biri uning hech qo‘rqmasdan boylar va mulk sohiblarini Alloh yo‘lida tahdid etganini, yana biri uning oddiy bir cho‘pon bo‘lganini va och ko‘rinmaslik uchun qorniga tosh bog‘lab yurishini gapirar edi. Quloqlarimga ishonmadim. Axir Muso ham, Ibrohim ham cho‘ponlar orasidan tanlangan bir ogohlantiruvchi, vahdatni ko‘rsatuvchi elchi edi. Ka’bada doimiy yig‘ilishlarning bo‘lib o‘tayotgani, uning va’zlarining faqir va miskinlarni kuchli isyonning eshigiga keltirib qo‘yganini ko‘rsatar edi, Makkada uning yo‘llariga ming turli to‘siqlar qo‘yilgan bo‘lsa-da, bu yerda juda katta o‘zgarishlar bo‘lishi sezilib qolgan edi. Mushriklar uni yolg‘onchi, soxtakor, otalarining omonat qoldirib ketgan muqaddas dinning ashaddiy dushmani deb hisoblamoqda edi. U esa to‘xtamasdan va’z etar, insonlarga yillar davomida yo‘qotgan haqiqatlarini bayon etmoqda edi.

Kecha tanho edi. Zim-ziyo qorong‘ulikda faqat cho‘l hasharotlari chiqargan ovozdan boshqa hech narsa yo‘q edi. Ka’bada mushriklar yana to‘planib olib u Rasulni g‘iybat qilayotgan edi. Bahslashuv turli fikrlar bilan kuchayib borayotgan choqda U paydo bo‘ldi va men uni ilk da’fa ko‘rdim. Gaplarini boshlaganda yana bir marta quloqlarimga ishonmadim. “Insonlarni ezmoq uchun qo‘llanayotgan bu tangrilaringiz nega sizdan boshqa qullariga yordamini qizg‘anmoqda. Bu tangrilar nega gunohsiz bo‘lgan go‘daklarning o‘limlarini istamoqda. Muqaddas hisoblaganingiz oylarda yig‘ilgan mollarni tangringiz uchun xarjlaysizmi, yo‘qsa, o‘z manfaatlaringiz uchunmi? O‘zi bu butlar sizdan mulk istaydigan qadar ojizmi? O‘zingiz yo‘nib yasagan bu haykalchalardan nimalarni umid qilmoqdasiz? Molu mulk Alloh yo‘lida sarflangunga qadar insonning ichini yoqadigan bir qur olov bo‘lib turaveradi!” Ko‘zlarimga ishona olmayotgan edim. So‘zlariga hayrat etishnimi, xitobatini, go‘zalliginimi?.. nima qilishni bilmay angrayib qolgan edim. U qo‘rqmasdan yolg‘iz holida o‘zining joniga qasd qilish rejasini tuzayotgan zolimlar to‘dasiga kirib ularga to‘g‘ri yo‘lni ko‘rsatayotgan edi.

Payg‘ambar bu so‘zlarni aytganidan so‘ng mushriklar ustiga yuraverdi. Olomon uni ayovsizlarcha ura boshladi. U esa adl turib so‘zlarini hech e’tiroz bildira olmaydigan tarzda davom ettirar edi. Yugurib borib g‘avg‘oga qo‘shilib ketdim, Zulmga qarshi mening ilk mujodalam ana shu edi. Mushriklar mening o‘rtaga kirganimni ko‘rganidan so‘ng bizni Ka’badan surib chiqardi. Ushbu buyuk tanishuv o‘sha kecha boshlandi. Yillar davomida izlaganim haqiqat, erkinlik, hurriyat otashi ilk marta to‘g‘ri uzanga tushdi. Uning yuzi qonagan edi, go‘zalligining timsoli bo‘lgan ko‘zlarini yuzimga tikdi:

– Assalomu alaykum!

– Vaalaykum assalom, yo Rasululloh!

Har ish shunday boshlandi va har ish shunday nihoyasiga yetdi.

Robiya JO‘RAQULOVA tayyorladi.

Siyrat va islom tarixi

MА`LUMOTNI IJTIMOIY TАRMOQLАRDА ULАSHING

Maqolalar

“E’tibor va rag‘batlar yanada mas’uliyat bilan ishlashga undamoqda”

24.09.2026 1444 10 min.

Xorazm viloyati bosh imom-xatibi, “Imom Buxoriy” ordeni sohibi Xayrulloh domla Abdullayev bilan suhbat

– Assalomu alaykum muhtaram qozi domla. Avvalo, viloyat vakilligining ko‘rkam yangi binosi muborak bo‘lsin. Juda go‘zal, fayzli maskanga ega bo‘libsizlar...

– Va alaykum assalom va rohmatulloh. Rahmat, alhamdulillah. Darhaqiqat, bu yil vakillik faoliyatidagi eng quvonarli yangiliklardan biri zamon talablari asosida barpo etilgan yangi ma’muriy binoga ko‘chib o‘tganimiz bo‘ldi. Albatta, bu yutuqlar zamirida muhtaram Yurtboshimizning diniy sohaga qaratayotgan alohida e’tibori turibdi.

Endi viloyatdagi barcha imom-xatib va imom-noiblar bir joyga jamlana oladi. Yig‘ilishlar, o‘quv-seminarlar, ma’naviy-ma’rifiy tadbirlar, davra suhbatlari va boshqa yirik tadbirlarni bevosita vakillikning o‘zida o‘tkazish imkoniyatiga egamiz. Shuningdek, yangi binoda kichik majlislar zali, axborot-media faoliyati va tasvirga olish uchun maxsus xonalar ham tashkil etildi.

Faoliyatimizdagi yana bir quvonchli voqea – 2025 yilda O‘zbekiston musulmonlari idorasi nashrlari bo‘lgan «Hidoyat», «Mo‘minalar» jurnallari va «Islom nuri» gazetasi obunasini uyushqoqlik bilan tashkil etganimiz uchun vakilligimiz damas avtomobili bilan taqdirlangani bo‘ldi. Bu e’tibor va rag‘bat jamoamiz uchun yanada katta mas’uliyat yukladi.

– Siz ilk bor Xorazm viloyati vakili sifatida faoliyat boshlagan davrda holat qanday edi, bugun-chi?..

- Bundan rosa 11 yil oldin – 2015 yilning may oyida O‘zbekiston musulmonlari idorasining Xorazm viloyati vakili, viloyat bosh imom-xatibi sifatida faoliyat boshlaganman. O‘sha davrda vakillik o‘z binosiga ega emasdi. Faoliyatni atroflicha tahlil qilib, sohadagi mavjud holat, muammo va ehtiyojlardan kelib chiqqan holda tizimli yondashuvni talab etadigan ustuvor vazifalarni belgilab olgandik.

O‘tgan yillar davomida aniq maqsad va rejalar asosida izchil, bosqichma-bosqich ishlar amalga oshirildi. Eng muhimi, bu jarayonda faqat mavjud muammolarni bartaraf etish bilan cheklanib qolmasdan, vakillik faoliyatini zamonaviy talablar asosida qayta tashkil etish, uning boshqaruv va nazorat mexanizmlarini takomillashtirishga ustuvor ahamiyat qaratildi.

Bugungi kunda vakillikda 19 nafar malakali, o‘z ishining bilimdoni bo‘lgan xodim faoliyat yuritmoqda. Masjidlar bilan ishlash, haj va umra, axborot-media, ayol-qizlar, huquqshunoslik, kadrlar masalalari, moliya-xo‘jalik kabi muhim yo‘nalishlar bo‘yicha bo‘limlar tashkil etildi. Vakilligimiz zamonaviy moddiy-texnik bazaga ega bo‘lib, raqamli texnologiyalar va ilg‘or ish uslublaridan samarali foydalanib kelmoqda.

Muftiy hazratlarining bevosita boshchiliklarida masjidlarda faoliyat yuritayotgan imom-xatiblar va imom-noiblari muntazam oylik ish haqi bilan ta’minlandi. Bu esa ularning ijtimoiy barqarorligini mustahkamlash, o‘z xizmat vazifalarini sidqidildan, xotirjam, mas’uliyat bilan ado etishlari uchun muhim omil bo‘lmoqda.

Viloyatga ajratiladigan haj kvotalari ham yildan-yilga oshib bormoqda.

– Viloyatda ayni paytda qancha masjid bor? Masjidlar va ularda faoliyat olib borayotgan imom-domlalarning zamon bilan hamnafas bo‘lishi borasida ham to‘xtalsangiz...

– Masjidlar borasida katta o‘zgarishlar bor. Hozir viloyatimizda 98 ta jome masjid faoliyat yuritmoqda. O‘tgan yillar davomida 27 ta masjid zamon talablariga mos ravishda qayta bunyod etildi, 10 dan ortiq masjidda keng ko‘lamli ta’mirlash ishlari qilindi. 35 dan ortiq tahoratxona to‘liq qayta qurilib, zamonaviy talablar asosida foydalanishga topshirildi.

Imom-xatiblar uchun o‘quv-seminarlar, malaka oshirish mashg‘ulotlari, Qur’on va tajvid bo‘yicha amaliy darslar tashkil etilmoqda. Jumladan, 2026 yilda Xorazm viloyatida imom-xatib va imom noiblar uchun qiroat darslari o‘tkazildi.

Imom-domlalarimiz faoliyati faqat masjid va diniy marosimlarni o‘tkazish bilan cheklanib qolmay, ular mahalla, ta’lim muassasalari, mehnat jamoalari, yoshlar, xotin-qizlar, mehnat migrantlari va boshqa ijtimoiy qatlamlar bilan yaqin hamkorlikda ish olib bormoqda.

Imom-xatiblar uchun muntazam ravishda malaka oshirish kurslari, o‘quv-seminarlar va amaliy mashg‘ulotlar tashkil etish yo‘lga qo‘yildi. Aholi bilan ochiq muloqotlar, ma’naviy-ma’rifiy uchrashuvlar va manzilli targ‘ibot ishlarining ko‘lami ham sezilarli darajada kengaydi. “Jaholatga qarshi ma’rifat” g‘oyasini keng targ‘ib etish, yot g‘oyalarga qarshi ma’rifiy immunitetni kuchaytirish, huquqbuzarlik, jinoyatchilikning oldini olish, atrof-muhitni asrashga qaratilgan keng ko‘lamli targ‘ibot-tashviqot tadbirlari yiliga 17 mingdan ortiqni tashkil etmoqda.

Aholi murojaatlari bilan ishlash, ehtiyojmand oilalar holidan xabar olish, xayru ehson va saxovat tadbirlarini tashkil etish, yoshlarni qo‘llab-quvvatlash, oilalarda tinchlik va totuvlikni mustahkamlash borasida ham salmoqli ishlar amalga oshirilmoqda.

– Vakillikning boshqa tashkilotlar bilan hamkorligi, imom-xatiblar va otinoyilarning diniy ma’lumotini oshirib borish yo‘lida qilinayotgan amaliy ishlarning samaralari haqida ham aytib o‘tsangiz...

– Viloyat hokimligi va tegishli davlat tashkilotlari, mahalliy idoralar, ta’lim muassasalari, mahalla faollari hamda jamoat tashkilotlari bilan o‘zaro hamkorlik asosida ish olib boramiz. Bu hamkorlikdan ko‘zlangan asosiy maqsad yurtimizdagi tinchlik- osoyishtalikni asrash, jamiyatda o‘zaro hurmat va bag‘rikenglik muhitini mustahkamlash, aholi, ayniqsa, yoshlarni sog‘lom e’tiqod va milliy-ma’naviy qadriyatlar ruhida tarbiyalashga hissa qo‘shishdir.

Vakillik tizimida 175 nafar imom-xatib va imom-noib bor. Ularning malakasini oshirib borish maqsadida malaka oshirish kurslari bilan ham hamkorligimiz bor. Oxirgi bir yilda 29 nafar imom-xatib, 22 nafar imom-noib Diniy-ma’rifiy sohada malaka oshirish va qayta tayyorlash instituti hamda Imom Buxoriy nomidagi Toshkent islom institutida malaka oshirib keldi.

Qiyos uchun, 2015 yilda viloyatdagi imom-xatiblarning 11 nafari oliy ma’lumotga ega edi. Hozirgacha 55 nafar imom-xatib diniy oliy ma’lumotli bo‘ldi. 8 nafar imom-xatib va 1 nafar imom-noib magistrlik darajasini oldi, 3 nafar imom-xatib esa doktorantura bosqichida tahsil olmoqda. 20 nafar imom-xatib Imom Buxoriy nomidagi Toshkent islom institutida modul tizimi asosida o‘qiyapti. Yaqin istiqbolda imom-xatiblarimizni 100 foiz oliy diniy ma’lumotli qilish niyatidamiz. Shu bilan birgada 8 nafar imom-xatib tomonidan 12 ta diniy ma’rifiy kitoblar nashr etildi.

Otinoyilar faoliyatini yagona tizim asosida tashkil etishga ham alohida e’tibor qaratilmoqda. Viloyatda faoliyat yuritayotgan 281 nafar otinoyining malakasini muntazam oshirish, ish samaradorligini o‘rganish bo‘yicha tizimli ishlar yo‘lga qo‘yilgan. Otinoyilar mahallalarda xotin-qizlar bilan manzilli ishlash, ularning diniy savodxonligini oshirish, murojaatlarini o‘rganish, oilaviy muhitni sog‘lomlashtirish va ma’naviy-ma’rifiy muhitni mustahkamlashda faol ishtirok etmoqda.

– Aholining diniy savodxonligini oshirishga xizmat qilayotgan Qur’oni karim va tajvidni o‘rgatish o‘quv kursi faoliyati haqida ham to‘xtalsangiz?

– “Imom Faxriddin ar-Roziy” o‘rta-maxsus islom ta’lim muassasasida Qur’oni karim va tajvidni o‘rgatish o‘quv kursi faoliyati yo‘lga qo‘yilgan. Tinglovchilarni ro‘yxatga olish kitoblari raqamlanib, muhrlangan hamda ularni elektron shaklda yuritish tashkil etilgan. O‘quv kursini muvaffaqiyatli tamomlagan tinglovchilarga sertifikatlar taqdim etiladi.

Bugungi kunga qadar kurslarga 10 mingdan ziyod tinglovchi ro‘yxatdan o‘tgan bo‘lib, ularning 4 mingdan ortig‘i o‘quv kurslarini muvaffaqiyatli tamomlagan. O‘zbekiston musulmonlari idorasining tegishli topshirig‘iga asosan, 2025 yildan boshlab Qur’oni karim va tajvidni o‘rgatish kurslarida o‘qish istagini bildirgan 60 yosh va undan yuqori bo‘lgan fuqarolarni navbatsiz, alohida kvota asosida qabul qilish yo‘lga qo‘yildi. Shuningdek, 2026 yil yoz oylarida maktab va oliy ta’lim muassasalarida dars beruvchi pedagoglarning mehnat ta’tili vaqtlari hisobga olinib, 15 ta kvota tashkil etildi. Bu ishlar Qur’oni karimni o‘rganish istagida bo‘lganlar uchun yanada qulay imkoniyatdir.

– “Vaqf” xayriya jamoat fondi viloyat filiali tomonidan ijtimoiy ko‘mak, masjid-madrasalarni qo‘llab-quvvatlash bo‘yicha qanday xayrli ishlar amalga oshirilmoqda?

– Shu yilning boshidan buyon filial tomonidan ijtimoiy himoyaga muhtoj va ehtiyojmand 2 869 ta oilaga jami 5 milliard 49 million 104 ming so‘m miqdorida moddiy yordam ko‘rsatildi. E’tiborli jihati, 2025 yil Ramazon oyida boquvchisini yo‘qotgan oilalarga 3 ta uy-joy qurib berilgan bo‘lsa, ayni paytda yana 9 ta uy qurib bitkazilib, ularning hujjatlarini rasmiylashtirish ishlari amalga oshirilmoqda. Bu ezgu ishlar xalqimizga xos mehr-oqibat va saxovatning yana bir amaliy ifodasidir.

Fondning xayrli ishlari ta’lim sohasini ham qamrab olgan. Xususan, “Imom Faxriddin ar-Roziy” o‘rta maxsus islom ta’lim muassasasida tahsil olayotgan, kontrakt to‘lovini amalga oshirishda qiynalayotgan 8 nafar talabaga jami 76 million so‘m miqdorida kontrakt to‘lovlari to‘lab berildi. Ta’lim muassasasining tashqi qiyofasi va obodligiga ham e’tibor qaratilib, madrasa tashqi devorlarini pardozlash va ta’mirlash ishlariga 14 million 904 ming so‘m yo‘naltirildi.

Shuningdek, homiylarni jalb etgan holda, o‘tgan o‘quv yilida talabalarning kontrakt to‘lovlari uchun 100 million so‘m mablag‘ ajratib berilgan bo‘lsa, yangi o‘quv yili boshlanishi munosabati bilan yana 60 million so‘m miqdorida kontrakt to‘lovlariga ko‘mak ko‘rsatildi.

Masjidlarni zarur jihozlar bilan ta’minlash borasida ham bir qator xayrli ishlar amalga oshirilmoqda. Jumladan, 4 ta masjid uchun jami 67 million 51 ming so‘mlik ovoz kuchaytirgich jihozlari olib berildi.

Kelgusida ham “Vaqf” xayriya jamoat fondi Xorazm viloyati filiali tomonidan ehtiyojmand oilalarni qo‘llab-quvvatlash, yoshlarning ta’lim olishiga ko‘maklashish, masjid va madrasalarni obod qilish kabi xayrli tashabbuslar davom ettiriladi.

Umuman olganda, vakilligimiz va tizim xodimlari o‘z faoliyatiga bir martalik tadbir deb emas, balki zimmasidagi mas’uliyat, uzluksiz jarayon sifatida yondashmoqda.

– Mazmunli va foydali suhbatingiz uchun tashakkur.

O‘MI Matbuot va media bo‘limi xodimi Abdulatif ABDULLAYEV suhbatlashdi.

O'zbekiston yangiliklari

MА`LUMOTNI IJTIMOIY TАRMOQLАRDА ULАSHING

Muallif

Oʼzbekiston musulmonlari idorasi Matbuot xizmati