Joriy yilning 6 may kuni O‘zbekiston musulmonlari idorasining Qashqadaryo viloyatidagi vakili, viloyat bosh imom-xatibi Raxmatillo domla Usmonov Chiroqchi tumanidagi "Hazrati Umar" jome masjidida sayyor seminar o‘tkazdi. Tadbirda tuman bosh imom-xatiblari hamda Chiroqchi va Ko‘kdala tumani imom-xatiblari ishtirok etdi.

Seminarda 2026 yilning birinchi to‘rt oyi davomida hududlarda olib borilgan ma’naviy-ma’rifiy ishlar, aholi bilan muloqot samaradorligi hamda yoshlar tarbiyasiga doir masalalar muhokama qilindi.

Ustuvor vazifalar belgilandi

Uchrashuv davomida imom-xatiblar oldida turgan dolzarb vazifalar aniqlab berildi. Xususan, masjid, ziyoratgoh va qabristonlarning obodligi va tartibiga doimiy e’tibor qaratish zarurligi ta’kidlandi. Bundan tashqari, yaqinlashib kelayotgan Qurbon hayitiga munosib tayyorgarlik ko‘rish va bayram tadbirlarini yuqori saviyada tashkil etish yuzasidan amaliy ko‘rsatmalar berildi.

Bosh imom-xatib nutqida ma’ruzalar mazmunan boy, hayotiy misollarga asoslangan va ta’sirchan bo‘lishi lozimligini alohida qayd etdi. Aholi, ayniqsa yoshlar qalbiga yetib boradigan uslubda targ‘ibot ishlarini olib borish va zamonaviy axborot maydonida faollikni oshirish muhim vazifa sifatida belgilandi.

Faoliyat tahlil qilindi

Joylarda aniqlangan ayrim kamchiliklar batafsil tahlil qilinib, ularni qisqa muddatda bartaraf etish bo‘yicha topshiriqlar berildi. Targ‘ibot ishlarini yanada faollashtirish va aholi bilan yaqin muloqotni yo‘lga qo‘yish bo‘yicha aniq tavsiyalar ishlab chiqildi.

Seminar yakunida barcha imom-xatiblarga yuklatilgan vazifalarni sidqidildan bajarish, joylarda sog‘lom ma’naviy muhitni ta’minlash va jamoatchilik ishonchini mustahkamlash yuzasidan ko‘rsatmalar berildi.

Qashqadaryo viloyati vakilligi
Matbuot xizmati