Bugun, 29 aprel kuni “Yagona olimpiada – 2026” bilimlar bellashuvining yakuniy respublika bosqichi Imom Termiziy nomidagi islom institutida bo‘lib o‘tdi. Unda 10 ta o‘rta maxsus islom ta’lim muassasalari kesimida birinchilikni qo‘lga kiritgan talabalar ishtirok etdi. 

Tanlovda ishtirokchilar arab tili, fiqh, aqoid va O‘zbekiston tarixi fanlari bo‘yicha bilim va malakalarini sinovdan o‘tkazdi. Mazkur jarayonlarini malakali hakamlar hay’ati baholab bordi. 

Qizg‘in kechgan bahslardan so‘ng yakuniy natijalar quyidagicha bo‘ldi:

I-o‘rinni “Ko‘kaldosh” o‘rta maxsus islom ta’lim muassasasi talabasi Ilhom Baxtiyorov qo‘lga kiritdi. 

G‘olib talaba “Vaqf” fondi granti asosida oliy diniy ta’lim muassasasiga imtihonsiz o‘qishga kirish imkoniyatiga ega bo‘ldi. Shuningdek, u O‘zbekiston musulmonlari idorasining birinchi darajali diplomi va 10 million so‘mlik pul mukofotini qo‘lga kiritdi. 

II-o‘rin “Hidoya” o‘rta maxsus islom ta’lim muascasasi talabasi Muhammadyusuf Abduvohidovga nasib etdi.

Ikkinchi o‘rin sohibi oliy diniy ta’lim muassasasiga o‘qishga kirishi uchun imtihon natijalari bo‘yicha o‘zi to‘plagan ballning 50 foizi miqdorida qo‘shimcha ball olish imtiyozini qo‘lga kiritdi. Unga O‘zbekiston musulmonlari idorasining ikkinchi darajali diplomi va 7 million so‘mlik pul mukofoti berildi;  

III-o‘ringa “Xoja Buxoriy” o‘rta maxsus islom ta’lim muassasasi talabasi Otabek Yusupov munosib deb topildi. 

Talabaga oliy diniy ta’lim muassasasiga o‘qishga kirishi uchun imtihon natijalari bo‘yicha o‘zi to‘plagan ballning 25 foizi miqdorida qo‘shimcha ball olish imtiyozi hamda O‘zbekiston musulmonlari idorasining uchinchi darajali diplomi va 5 million so‘mlik pul mukofoti berildi. 

Tanlovning boshqa ishtirokchilariga ham qimmatbaho sovg‘alar va faxriy yorliqlar topshirildi.

Alloh taolo olimpiada g‘oliblariga imtiyoz va sovrinlarni muborak qilsin, ilm musobaqalarining bardavom bo‘lishini nasib aylasin! 

O‘zbekiston musulmonlari idorasi
Matbuot xizmati