Bugun Buxoro shahridagi Mir Arab oliy madrasasida “Islom ma’rifati — axloqiy va ma’naviy barkamollik asosi” mavzusida an’anaviy respublika ilmiy-amaliy anjumani yuqori saviyada tashkil etildi.

Nufuzli anjumanda O‘zbekiston musulmonlari idorasi raisi o‘rinbosari, professor Muhammadolim Muhammadsidiqov, oliy madrasa rektori Jobir domla Elov, Bahouddin Naqshband ilmiy-tadqiqot markazi direktori Azizxo‘ja Inoyatov hamda mamlakatimizning yetakchi oliy ta’lim muassasalari va ilmiy markazlaridan kelgan falsafa, psixologiya, tarix va islomshunoslik sohalari olimlari, professor-o‘qituvchilar hamda yosh tadqiqotchilar ishtirok etdi.

Anjuman ishtirokchilari islom ma’rifatining inson kamolotidagi o‘rni, yoshlarni vatanparvarlik va bag‘rikenglik ruhida tarbiyalash hamda jamiyatda ma’naviy muhitni sog‘lomlashtirish kabi dolzarb masalalarni atroflicha muhokama qildi.

Ma’ruzalarda ajdodlarimizdan meros qolgan boy ilmiy xazinani o‘rganish va uni yosh avlod qalbiga singdirish bugungi kunning eng muhim vazifasi ekani alohida qayd etildi. 
 

Ayniqsa, globallashuv sharoitida axborot makonidagi tahdidlarga qarshi yoshlarda mustaqil fikrlash va mafkuraviy immunitetni shakllantirishda diniy-ma’rifiy ishlarning ahamiyatiga urg‘u berildi.

Ulamolar, psixolog va faylasuf olimlar tomonidan inson ma’naviyatini yuksaltirish va oilaviy qadriyatlarni mustahkamlash yuzasidan ilmiy asoslangan taklif va tavsiyalar ilgari surildi.

Tadbir yakunida yosh olimlarning ilmiy izlanishlari yuqori baholanib, bu kabi anjumanlar ilm-fan va ma’naviyat rivojiga, ayniqsa, navqiron avlodning intellektual salohiyatini oshirishga xizmat qilishi ta’kidlandi.

Faol ishtirok etgan ma’ruzachi va olimlarga Mir Arab oliy madrasasi rahbariyati tomonidan maxsus sertifikatlar topshirildi. 

O‘zbekiston musulmonlari idorasi
Matbuot xizmati