O‘zbekiston haj delegatsiyasi 20 yanvar kuni Makka shahrida Haj vazirligining Sharqiy Yevropa va Turkiya hojilariga xizmat ko‘rsatuvchi muassasada uchrashuv o‘tkazdi. Muassasa rahbari Toriq al-Inqaviy va muassasa mas’ullari bilan bo‘lib o‘tgan muzokara chog‘ida, 2017 yilgi haj mavsumini namunali tarzda o‘tkazish bo‘yicha qator masalalar ko‘rib chiqildi. O‘zbekistonlik ziyoratchilarning haj manosiklarini namunali bajarishi, Mino, Arafot va Muzdalifa vodiylaridagi tashkiliy masalalar muhokama etildi. Muassasa rahbari Toriq al-Inqaviy, o‘tgan haj mavsumlarida O‘zbekiston ishchi guruhining haj tadbirlarini muntazam tartibli va namunali tarzda tashkil etib kelayotganini ta’kidlab, ishchi guruh faoliyatiga yuqori baho berdi.
Uchrashuv yakuni bo‘yicha O‘zbekistonning 7200 kishilik yangi haj kvotasi doirasida xizmat ko‘rsatish bo‘yicha bayonnoma imzolandi.
Shu kuni delegatsiya, hojilarimizga xizmat qilib kelayotgan oshxona majmuasining bugungi holati bilan tanishdi. Oshxona majmuasi, turli taomlar tayyorlanadigan maxsus xonalar, taom tayyorlash yangi uskunalar bilan jihozlangani, hamda go‘sht va boshqa mahsulotlarni saqlash uchun olingan yangi muzlatgichlar va oshpazlar xordiq chiqarishi uchun yaratilgan yangi sharoitlar bilan tanishdi. Delegatsiya rahbari oshxona mas’ullariga kelayotgan haj mavsumida hojilarimizga beriladigan taomlarning sifatini yanada yaxshilash va o‘z vaqtida yetkazish, tozalik va sanitariya qoidalariga rioya qilish bo‘yicha takliflar va tavsiyalar berdi.
O‘zbekiston musulmonlari idorasi
axborot xizmati
#xabar #haj2025
Bugun, 12 iyun kuni erta tongda yurtimiz hojilarining ilk guruhlari yurtimizga yo‘l olishdi.
Aytib o‘tish joiz, bu yilgi haj mavsumi har qachongidan ham fayzli, shukuhli o‘tdi. Haj arkonlarini bajarish uchun yurtimiz mo‘min-musulmonlariga Madinai munavvara, Makkai mukarramada yaratilgan shart-sharoitlarga ko‘plab musulmonlarning havasi kelganiga barcha guvoh bo‘ldi.
Ayniqsa, mehmonxonalar, Mino, Arafot vodiylaridagi qulaylik va imkoniyatlar, tibbiy va transport xizmatlari barchani mamnun etdi.
Endilikda ibodatlarni huzurlanib ado etgan, yuz-ko‘zlari porlagan, peshonalaridan nur balqigan hojilarimizning dastlabki guruhi diyorimizga qaytishmoqda.
Alloh taolo hojilarimizning hajlarini qabul aylasin. Farzandu anjumandlari bag‘riga eson-omon yetib olishsin.
O‘zbekiston musulmonlari idorasi
Matbuot xizmati