Robi’ul avval oyi – musulmonlar uchun ulkan baxtu saodat, xursandchilik oyi bo‘lib, bu oyda butun olamlarga rahmat, ikki jahon sarvari, oxir zamon Payg‘ambari Muhammad sollallohu alayhi vasallam tavallud topganlar. Bu oyni musulmonlar o‘zgacha tayyorgarlik bilan kutib olishadi va Rasululloh alayhissalomga bo‘lgan muhabbatning kichik bir ko‘rinishi sifatida mavlidi sharif tadbirlari o‘tkaziladi, u zotning siyratlarini o‘rganishga alohida e’tibor qaratiladi. Ana shunday mavlid marosimlaridan biri joriy yilning 16 dekabr kuni Poytaxtimizdagi “Abu Bakr Qaffol Shoshiy” masjidida bo‘lib o‘tdi. Unda O‘zbekiston musulmonlari idorasi raisi, muftiy Usmonxon Alimov hazratlari qatnashdilar. Dastlab, mavlidi sharif o‘qildi, so‘ngra Muftiy hazrat boshchilik namozxonlar juma namozini ado etishdi. Juma namozi o‘qib bo‘lingach, Payg‘ambar alayhissalomga ko‘pdan-ko‘p salavotlar aytildi, yakunda Qur’oni karim tilovati va ezgu duolar qilindi.

O‘MI Axborot xizmati