2016 yil 6 dekabr kuni Afg‘oniston Islom Respublikasining Toshkentdagi elchixonasi maslahatchisi Abdul Ahad Xoliqyor O‘zbekiston musulmonlari idorasiga tashrif buyurdi.

Uchrashuvda janob A.Xoliqyor afg‘on va o‘zbek xalqlari azal-azaldan do‘stu qadrdon ekani va urf-odatlari, kiyinishi, odob-axloqi, so‘zlashuvi bir-biriga o‘xshab ketishini qayd etdi. Mehmon so‘zida davom etib: – O‘zbekiston Respublikasining Birinchi Prezidenti Islom Karimov tomonidan olib borilgan oqilona siyosat tufayli o‘zbek xalqi tinch va baxtiyor yashamoqda. Dunyodagi ko‘p xalqlar bunday osoyishta muhitni orzu qilishadi, deya o‘z fikrlarini izhor qildi.

Muloqot davomida Shayx Abdulaziz Mansur hazratlari so‘z olib, mehmonni diniy idoraga tashrifi bilan samimiy qutlab, haqiqatdan ham o‘zbek va afg‘on xalqlari qadim-qadimdan o‘zaro ahillikda, qardoshlikda yashab kelayotganlari va ulug‘ ajdodlarni har ikki xalq doim ehtirom qilib kelganini ta’kidladi. Shayx hazratlari mehmonlarga O‘zbekiston musulmonlari idorasi faoliyati haqida ma’lumot berdi.

Suhbat davomida tomonlar bugungi kunda buzg‘unchi kuchlar Islom dinini niqob qilib olib, turli zo‘ravonlik va qo‘poruvchilik harakatlarini amalga oshirayotganini afsus bilan qayd etishdi. Shuningdek, Islom dini har qanday yovuzlikni qoralashini ta’kidlashdi.  
Tashrif yakunida mehmonga esdalik sovg‘alari topshirildi.

 Maqsud Karimov,

Xalqaro aloqalar bo‘limi mutaxassisi