Alloh taoloning kalomi Qur’oni karim mo‘min-musulmonlar uchun hidoyat va bashoratdir. Bashorat so‘zi odatda xushxabar, yaxshilikni yetkazish, ma’lum qilish ma’nosida ishlatiladi. Mo‘minlarga xushxabar yetkazishdek sharafli ishni Alloh taolo bashariyatdan tanlab olgan O‘zining payg‘ambarlariga tayin qilgan. Alloh taolo bunday marhamat qiladi: «Biz payg‘ambarlarni faqat xushxabar beruvchi va ogohlantiruvchilar sifatidagina yuborurmiz» (Kahf, 56). Shuningdek, boshqa oyatda «Men faqat imon keltiradigan qavm uchun ogohlantiruvchi va xushxabar beruvchidirman»(A’rof, 188) deyiladi.

Biroq ba’zan bu so‘zni yomon, noxushxabarlarni, xususan, turli balo-ofatlar, munajjmimlarning baxtsizlik, omadsizlik to‘g‘risidagi xabarlarini yetkazishda ham istifoda etmoqdalar. Aslida esa yuqorida ta’kidlanganidek, bashorat faqatgina yaxshilik haqidagi xushxabardir. Qur’onda mo‘minlar uchun Robbilari tomonidan bir qancha bashorat, ya’ni xushxabarlar nozil bo‘lgan. Alloh taolo bunday marhamat qiladi: «Mo‘minlarga (oxirat mukofotlari haqida) xushxabar bering (ey, Muhammad)!» (Baqara, 223).

Oyatda kelgan mo‘minlarga beriladigan xushxabar, mukofotlar nimalar ekanligini Alloh taolo quyidagi oyatda marhamat qiladi:

«Imon keltirib, solih amallarni qilganlarga xushxabar beringki, ular uchun (jannatda) ostilaridan anhorlar (suvi) oqib turuvchi bog‘lar bordir» (Baqara, 25).

Demak, oyatga ko‘ra, mo‘min bo‘lish uchun til bilan imon keltirib, qalb bilan iqror bo‘lib va imonining tasdig‘i sifatida solih amallar qilish lozim. Shunda ular uchun ulkan mukofot – jannat bordir. Abu Mu’in Nasafiy agar imon faqatgina til bilan aytishdan iborat bo‘lsa, unda munofiq bilan mo‘minning o‘rtasida hech qanday farq qolmaydi, deydi.

Boshqa bir surada Alloh taolo yuqoridagi oyatda kelgan «bog‘lar»ni jannat bog‘lari ekanini ta’kidlaydi: «Parvardigorlari ularga O‘z tarafidan rahmat, rizolik va ular uchun ne’matlari doimiy (bo‘lmish) jannat (bog‘)lari to‘g‘risida xushxabar berur» (Tavba, 21).

Alloh barchalarimizni bu dunyo va oxirat mukofotlaridan to‘liq bahramand etsin! «Albatta, imon keltirgan, yaxshi ishlarni qilgan, namozni barkamol o‘qib, zakotni berganlar uchun Parvardigorlarining huzurida (maxsus) mukofotlari bordir. Ularga xavf ham bo‘lmas va ular tashvish ham chekmaslar».

Davron NURMUHAMMAD

tayyorladi