Poytaxtimizning Olmazor tumanida O‘zbekiston musulmonlari idorasi raisining o‘rinbosari Zayniddin domla Eshonqulov ishtirokida “Jaholatga qarshi ma’rifat” shiori ostida aholi vakillari, yoshlar va xotin-qizlar ishtirokida ma’naviy-ma’rifiy tadbir o‘tkazildi.
Tumandagi "Olimpiya" to‘yxonasida bo‘lib o‘tgan ushbu uchrashuvda hozirgi kunda yoshlar tarbiyasi, farzandlarni ona Vatanga sadoqat ruhida tarbiyalash hamda yoshlarni ta’lim olishi muhimligi to‘g‘risida alohida to‘xtalib o‘tildi.
Ma’ruza davomida farzandlarni yot g‘oyalar ta’siridan saqlash, ularni qadriyatlarimizga mos ravishda sog‘lom e’tiqodli qilib tarbiyalashdagi har bir ota-onaning o‘rni kabi muhim mavzularda ham fikr-mulohazalar bildirildi.
Xorijiy davlatlarga ishlash, malaka oshirish yoki o‘qish maqsadida bo‘lib turgan vatandoshlar holidan xabar olish, diniy-milliy qadriyatlarga hurmat ruhida tarbiyalash va ona Vatanga muhabbat tuyg‘ularini shakllantirish kabi xayrli ishlar amalga oshirilmoqda.
Ayni kunlarda bir guruh tajribali ulamo va imom domlalar Janubiy Koreyada xizmat safarini davom ettirmoqda. Jumladan, Fatvo markazi bosh mutaxassisi Saidjamol Masayitov, Toshkent shahridagi “Oq uy” masjidi imom-xatibi Isroiljon domla Ismoiljonov, "Abu Saxiy” masjidi imom-xatibi Ziyovuddin domla Mirsodiqov, Namangan shahridagi “Said Azim Xo‘ja” masjidi imom-xatibi Muhammadbobur domla Nasriddinov va Buxoro viloyati Romitan tumani bosh imom-xatibi Otabek domla Rahimov vatandoshlar bilan muloqotlar qilmoqda. Ushbu safarda Din ishlari bo‘yicha qo‘mita boshqarma boshlig‘i Behzod Soipov hamrohlik qilmoqda.
Imom-xatiblar Janubiy Koreyadagi bir necha masjidlarda yuzlab hamyurtlarimizga halol rizq topishning fazilatlari, yot g‘oyalardan saqlanish, yurtga sadoqat, ota-onaga hurmat, farzand tarbiyasi, omonatga rioya qilish kabi mavzularda ma’rifiy suhbatlar o‘tkazishmoqda.
Vatandoshlarimiz bunday e’tibor va manfaatli ma’ruzalardan mamnun bo‘lib, o‘zlarini qiziqtirgan savollariga javob olishmoqda.
O‘zbekiston musulmonlari idorasi
Matbuot xizmati