Nafsimiz muammo sabab goh tushar tushkunlikka,
Yechim bog‘ich yechgudek, o‘rin bormi mahzunlikka?!

Baxt nima? Saodat mol-dunyoda-mi yoki mansabda? Javoblar turli, lekin keling mana bu ayolning saodatiga bir nazar solaylik:

Er o‘z ayoli bilan janjallashib qoldi va: “Seni albatta baxtsiz qilaman!”, dedi. Ayol esa hotirjamlik bilan: “Bunday qila olmaysiz”, dedi. Er ajablanib dedi: “Nima uchun?” Ayol bunday javob berdi: “Agar baxt mol-mulkda bo‘lganida siz meni undan mahrum qilardingiz, agar zeb-ziynatlarda bo‘lganida ularni mendan olib qo‘yardingiz, lekin baxt siz yoki boshqa insonlar egalik qila olmaydigan narsada. Mening baxtim iymonimda, iymonim esa qalbimda. Qalbimga faqat Allohgina egalik qilishga qodir”.

Mana shu haqiqiy baxt, chinakam saodat – iymon ne’matidir. Bu baxtni faqatgina Allohning muhabbati qalbi, fikri va nafsining tub-tubiga yetib borganlargina his eta oladi. Bandalariga haqiqiy baxt-saodatni ato etuvchi yakkayu yagona bo‘lgan Zot Allohdir. Shunday ekan Unga itoat va ibodat etib saodatni so‘rang, baxtni U tomondan qidiring.

Ushbu saodatni topish esa Rasululloh sollallohu alayhi vasallam keltirgan haqiqiy dinni o‘rganish bilan bo‘ladi. Kim ushbu yo‘lni anglasa unga chaylada uxlashi, qattiq joyda yotishi yoki bir burda non bilan kifoyalanishi ham dunyodagi eng baxtiyor inson bo‘lishiga to‘sqinlik qila olmaydi. Kim bu yo‘ldan adashsa uning umri mahzunlik va barcha narsadan mahrum bo‘lish bilan to‘lib ketadi.

Shu’la: To‘g‘ri, biz yashashimiz uchun mol-mulkka muhtoj bo‘lamiz. Lekin bu biz mol-dunyo uchun yashashimiz lozimligini bildirmaydi!

Doktor Oiz al-Qarniyning
"Dunyodagi eng baxtli ayol" kitobidan