Alloh taolo Qur’oni karimda tavhiddan oldin tinchlikni muqaddam qildi. Ibrohim alayxissalom Allohga duo qilar ekanlar, avvalo, Parvardigordan tinchlikni, so‘ngra tavhidni so‘radilar: «(Ey, Muhammad!) Eslang, Ibrohim aytgan edi: Ey, Rabbim! Bu shaharni (ya’ni, Makkani) tinch qilgin, meni va avlodlarimni sanamlarga sig‘inishdan yiroq qilgin!» (Ibrohim surasi, 35-oyat).

Yusuf alayhissalom ota-onalaridan Misrda tinchlik qaror topgandan so‘ng unga kirishlarini so‘radilar: «Bas, (shahar tashqarisida chodirda kutayotgan) Yusufning huzuriga kirganlarida, u ota-onasini o‘z bag‘riga bosdi va “inshoalloh, Misrga tinch-omon kirgaysiz”, – dedi» (Yusuf surasi, 99-oyat).

Muso alayhissalom qo‘rqqan paytlarida, Alloh taolo u zotning qalblariga taskin berib, tinch va xavfu-xatardan holi ekanliklari haqida xabar berdi: «Asoyingni (yerga) tashla! Bas, qachonki, (Muso) uni ilondek qimirlayotganini ko‘rgach, ortiga qaramay qochdi. (Unga deyildi:) Ey, Muso, qayt va qo‘rqma! Zero, sen (xavfu-xatardan) omonlikdagi kishilardandirsan» (Qasas surasi, 31-oyat).

Payg‘ambarimiz sollallohu alayhi vasallam Makkani fath etgan kunda, uning ahliga rahm shafqat ko‘rsatib, musulmonlar tomonidan ularga tinchlik va omonlik yetishini xabar berdilar. Olamlarga rahmat etib yuborilgan zot Rasululloh sollallohu alayhi vasallam: “Kimki Abu Sufyonning hovlisiga kirsa u omonda, kimki qurolini tashlasa u omonda, kimki masjidga kirsa u omonda”, dedilar.

Tinchlik ne’mati sihat-salomatlik ne’matidan ham ulug‘roqdir. Imom Roziy rahmatullohi alayh aytadilar: Bir olimdan: “Tinchlik afzalmi yoki sihat-salomatlikmi?” deb so‘radilar.

Olim: “Tinchlik afzal”, deb javob berdi. Buning dalili: “Agar bir qo‘y oyog‘ini sindirib olsa, biroz vaqt o‘tib, sog‘ayib yana o‘tlay boshlaydi. Agar qo‘yni bir joyga bog‘lab, unga yaqin joyga bo‘rini ham bog‘lab qo‘yilsa, u yeyish-ichishdan butkul to‘xtaydi, o‘lgunicha og‘ziga bir dona o‘t ham olmaydi”.

Alloh taolo butun dunyoga tinchlik ne’matini bardavom qilib bersin. Yurtimiz osmoni hamisha musaffo, xalqimiz turmushi faravon bo‘lsin!

O‘zbekiston musulmonlari idorasi

Matbuot xizmati