Ayol-qizlarga oid “Marvaridlar shodasi” kitobi taqdimoti o‘tkazildi
Shu yil 26 sentyabr kuni poytaxtimizdagi “Shayx Zayniddin” jome masjidida “Marvaridlar shodasi” kitobining taqdimoti bo‘lib o‘tdi.
Qur’oni karim tilovati va xayrli duolar bilan boshlangan tadbir avvalida so‘zga chiqqan notiqlar mazkur yangi kitob bilan ijodkor va ishtirokchilarni qutlash barobarida yurtimizda ayol-qizlarning ilmu ma’rifatini yuksaltirish, ularning salomatliklarini yaxshilash va yosh qizlarni ta’lim-tarbiya olishlari uchun munosib sharoit yaratish bo‘yicha amalga oshirilayotgan ishlar xususida so‘z yuritdilar.
Ma’rifiy tadbir davomida mazkur kitob bugungi kunda jamiyatimizda sog‘lom turmush tarzini targ‘ib qilish, ayol-qizlar savodxonligini oshirish, shariatimizning ayollarga xos bo‘lgan ahkomlarni sodda va tushunarli tarzda bayon etishda muhim ahamiyatga ega ekani ta’kidlandi. Shuningdek, risolaning ona tilimizga tarjima qilinishi va xalqimizga tuhfa etilgani ayni muddao bo‘lganiga urg‘u qaratildi. Bundan tashqari, ma’ruzalarda ayol-qizlarga xos tibbiy, ijtimoiy va psixologik tavsiyalar ham muhokama qilindi.
Tadbir davomida kitob muallifi Hanafiy fiqhi olimi, dinimizga ko‘p yillardan buyon xizmat qilib kelayotgan fazilatli Shayx Saloh Muhammad Abul Hojning tadbir ishtirokchilariga yo‘llagan video tabrigi namoyish etildi. Mazkur kitobni tarjima qilishda ishtirok etgan olimalar va “Xadichai Kubro” madrasasi ustozlari jamoasiga minnatdorlik izhor etildi.
Marosimda Din ishlari bo‘yicha qo‘mitasi rais o‘rinbosari, falsafa fanlari doktori, professor Matluba Qahharova, O‘zbekiston musulmonlari idorasi bo‘lim mudirasi v.b. Mohira Zufarova, Muslimaat.uz sayti rahbari, “Marvaridlar shodasi” kitobi bosh muharriri Odinaxon Muhammad Yusuf, shuningdek, Toshkent islom instituti, Xadichai Kubro madrasasi ustoz va talabalari hamda otinoyilar ishtirok etdi.
O‘zbekiston musulmonlari idorasi
Matbuot xizmati
Indoneziya haj va umra asossiatsiyalari delegatsiyasi yurtimizda
Bugun, 25 iyun kuni Indoneziya haj va umra asossiatsiyalarining doktor Muslim Iskandar boshchiligidagi vakillari O‘zbekiston musulmonlari idorasida bo‘lishdi. Mehmonlar bilan diniy idora raisining birinchi o‘rinbosari Homidjon domla Ishmatbekov uchrashuv o‘tkazdi.
Sakkiz nafar delegatsiya a’zolari: Doktor Muslim Iskandar, Asip Bisma Supriatna, Zaid Muslim Iskandar, Mustain Xattob, Muhammad Atsir Abdulaziz, Jannatul Ma’vo, Muhammad Iqbol hamda Hilman Parifiy birma-bir o‘zlarini tanishtirib, “Umra +” loyihasini o‘rganish maqsadida 3400 ta turfirma nomidan vakil bo‘lib kelishganini bildirishdi.
Uchrashuv avvalida Homidjon domla mehmonlarni tashrif bilan qutlab, kelganlari uchun minnatdorlik bildirdi. So‘nggi yillarda yurtimizda diniy-ma’rifiy, turizm va boshqa sohalarda bo‘layotgan yangilanishlar haqida aytib o‘tdi. Xususan, 2017 yilda tamal toshi qo‘yilgan Islom sivilaziyasi markazi, qayta bunyod etilayotgan Imom Buxoriy majmuasi, Hazrati Imom dahasida olib borilayotgan bunyodkorlik ishlariga to‘xtaldi.
O‘z navbatida delegatsiya rahbari Muslim Iskandar ularga bu taklifni bildirgan “Real Dreams” sayyohlik firmasidan minnatdor ekanliklarini aytib, O‘zbekiston haqida juda ham ijobiy taassurotlarda ekanini ta’kidladi. Birgina Toshkent shahridagi o‘rganishlari natijasida O‘zbekistonda ziyorat turizmi sohasi istiqbolli ekani, hali Samarqand, Buxoro, Xiva kabi qadim va navqiron shaharlarni ham borib ko‘rishlarini, lekin hozirdanoq “Umra +” loyihasi juda istiqbolli ekaniga amin bo‘lganini bayon etdi.
Delegatsiya a’zosi, “Kasturi” birlashmasi rahbari Muhammad Atir 2017 yilda ham O‘zbekistonga kelganini, o‘sha payt bilan oradan o‘tgan qisqa vaqtdagi ulkan o‘zgarishlardan hayratda ekanini aytib, bu ishlar yurtning allamolariga, ilmiy-ma’rifiy merosga bo‘lgan e’tiboridan darak ekaniga urg‘u berib o‘tdi.
Shuningdek, delegatsiyaning boshqa a’zolari – Indoneziyaning “Amphuri”, “Hagatama”, “NRA Group Ltd.” “Jannatul Ma’wah”, “Himpuh” kabi minglab turfirmalarni birlashtirgan asossiatsiyalari rahbarlari ham musulmon sayyohlar e’tibori va oqimini O‘zbekistonga bemalol yo‘naltirish mumkinligini, bu xayrli ish ikki davlat uchun ham har tomonlama manfaat keltirishini ta’kidlashdi.
O‘zbekiston musulmonlari idorasi
Matbuot xizmati
