Londonda IX Jahon halol taomlari festivali o‘tkaziladi
“IQNA” saytining “Arab News” nashriga tayanib xabar berishicha, shu yil sentyabr oyi oxirida Londonda IX Jahon halol taomlar festivali bo‘lib o‘tadi.
“Mahalliy lazzatlar (ta’mlar)” shiori ostida o‘tayotgan festival tashkilotchilari bu yil festivalga 20 mingdan ortiq kishi tashrif buyurishiga umid bildirmoqda. Butunjahon halol taomlar festivali shu yilning 28-29 sentyabr kunlari London stadionida bo‘lib o‘tadi va unda dunyoning turli burchaklaridagi davlatlar vakillari tomonidan tayyorlangan taomlar taqdim etiladi.
Ushbu tadbirda diqqat va qat’iy tanlangan Pokiston, Turkiya, Marokash, Indoneziya va boshqa mamlakatlardan sotuvchilar, oshpazlar va oziq-ovqat do‘konlari vakillari ishtirok etadi.
Dastur direktori Valid Jahongir dunyoda musulmonlar soni ortib borayotgani sababli sertifikatlangan halol mahsulotlarga talab ortib borayotganini qayd etdi.
Valid Jahongirning aytishicha, axloqiy, barqaror va sifatli oziq-ovqat mahsulotlari va taomlarga qiziqish ortib borayotgani nafaqat musulmon iste’molchilarni, balki boshqa din vakillarini ham halol oziq-ovqatga jalb qilmoqda.
Bu yilgi yana bir yangilik – mavritaniyalik taniqli oshpaz Shelin Permalo tomonidan o‘tkaziladigan pazandachilik shousi bo‘lib o‘tadi. U ITV telekanalining “Yulduzlar bilan taom tayyorlash” ko‘rsatuvidagi chiqishi bilan tanilgan. Ushbu interaktiv pazandachilik shousida unga boshqa taniqli oshpazlar yordam berishadi. Tadbirda Nadiya Husayn va Big Zu kabi mashhur shaxslar hamda ko‘plab mashhur aktyorlarning ishtirok etishi kutilmoqda.
Festival katta bolalar maydoni va bozorini yaratish orqali o‘zining oilaviy imkoniyatlarini kengaytirdi. Shuningdek, “Bizning kelajagimiz salomatligi” bilan hamkorlikda joylarda ko‘chma klinika tashkil etiladi, bu esa ishtirokchilarga tekshiruvdan o‘tish va ularning sog‘lig‘i haqida ma’lumot olish imkonini beradi.
Valid Jahongir qo‘shimcha qildi: “Biz festivalda interfaol panellar orqali muhokama va muloqotni rag‘batlantiramiz hamda hayotning barcha qatlamlaridagi odamlarga umumiy ovqatlanish, madaniyat va jamiyat qadriyatlari bilan bog‘lanish uchun joy beramiz”.
“Mahalliy lazzatlar (ta’mlar)” festivali hunarmand oziq-ovqat ishlab chiqaruvchilarga qaratilgan bo‘lib, oziq-ovqat ishlab chiqaruvchilarga o‘z mahsulotlarini yangi lazzatlarni kashf etmoqchi bo‘lgan minglab festival ishtirokchilariga targ‘ib qilish uchun platforma taqdim etadi.
O‘zbekiston musulmonlari idorasi
Matbuot xizmati
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
- «
- »