Qur’on barcha ehtiyojlaringiz va amallaringiz uchun dasturulamal bo‘luvchi Kitobdir.

1. Siz: “Omadsizman”, deb aytmang!

Chunki Alloh taolo: “Mo‘minlar najot topdilar” deb marhamat qilgan (Muminun surasi, 1-oyat).
 

2. Siz: “Bunchalik qiyin”, deb aytmang!

Chunki Alloh taolo: “Bas, albatta, har bir qiyinchilik bilan birga yengillik bordir. Albatta, har bir qiyinchilik bilan birga yengillik bordir” deb marhamat qilgan (Sharh surasi, 5-6-oyatlar).
 

3. Siz: “Menga hech kim yordam bermaydi”, deb aytmang!

Chunki Alloh taolo: “Mo‘minlarga madad berish Bizning zimmamizdagi haq bo‘lgan” deb marhamat qilgan (Rum surasi, 47-oyat).
 

4. Siz: “Yolg‘izman”, deb aytmang!

Chunki Alloh taolo: “Qo‘rqmangiz! Albatta, Men sizlar bilan birgaman – eshitaman va ko‘raman” deb marhamat qilgan (Sharh surasi, 5-6-oyatlar).

5. Siz: “Gunohlarim juda ko‘p”, deb aytmang!

Chunki Alloh taolo: “Albatta, Alloh tavba qiluvchilarni sevadi” deb marhamat qilgan (Baqara surasi, 222-oyat).

6. Siz: “Dinga amal qilish juda qiyin”, deb aytmang!

Chunki Alloh taolo: “Alloh sizlarga yengillikni istaydi, og‘irlikni xohlamaydi” deb marhamat qilgan (Baqara surasi, 185-oyat).


7. Siz: “Kambag‘al-faqirman”, deb aytmang!

Chunki Alloh taolo: “Imon keltirgan va solih amallarni qilganlar uchun mag‘firat va farovon rizq bordir” deb marhamat qilgan (Haj surasi, 50-oyat).


8. Siz: “Bemorman”, deb aytmang!

Chunki Alloh taolo: “Qur’onni mo‘minlar uchun shifo va rahmat o‘laroq nozil qilurmiz” deb marhamat qilgan (Isro surasi, 82-oyat).


9. Siz: “Bunga kuchim yetmaydi”, deb aytmang!

Chunki Alloh taolo: “Alloh hech bir jonga toqatidan tashqari narsani taklif etmaydi” deb marhamat qilgan (Baqara surasi, 286-oyat).


10. Siz: “Mehnatlarim qadrlanmayapti, o‘zimni qadrsiz his qilyapman”, deb aytmang!

Chunki Alloh taolo: “Albatta, bu sizlar uchun mukofot va sizlarning sa’y-harakatlaringiz (Alloh nazdida) maqbuldir” deb marhamat qilgan (Inson surasi, 22-oyat).


11. Siz: “Shaytonning makri buncha kuchli”, deb aytmang!

Chunki Alloh taolo: “Albatta, shaytonning makri zaifdir” deb marhamat qilgan (Niso surasi, 76-oyat).


12. Siz: “G‘alaba uzoqda”, deb aytmang!

Chunki Alloh taolo: “Ogoh bo‘lingki, Allohning yordami (hamisha) yaqindir” deb marhamat qilgan (Baqara surasi, 214-oyat).

Alloh taolo hayotimizning har bir lahzasini Qur’oni karim oyatlariga muvofiq o‘tkazishimizga tavfiq ato etsin!

Davron NURMUHAMMAD