Cavol: Hojatdan keyin avratni suv bilan emas, nam salfetka bilan poklash mumkinmi? Buni uzoq masofaga katta yuk mashinalarda yuradigan do‘stim so‘ragan edi.
 

Javob: Bismillahir Rohmanir Rohiym. Najosat chiqqan joyidan atrofiga yoyilmagan bo‘lsa, qog‘oz, tosh kabi narsalar bilan tozalanish mumkin. Agar dirham (katta tanga) miqdoridan ko‘p yoyilgan bo‘lsa, suv kabi suyuqlik bilan poklash lozim bo‘ladi. Chunki bunday holatda  badanga najosat tekkan hukmida bo‘lib, uni faqat yuvish bilan ketkaziladi.

ثم الاستنجاء بالأحجار إنما يجوز إذا اقتصرت النجاسة على موضع الحدث فأما إذا تعدت موضعها بأن جاوزت الشرج أجمعوا على أن ما جاوز موضع الشرج من النجاسة إذا كانت أكثر من قدر الدرهم يفترض غسلها بالماء ولا يكفيها الإزالة بالأحجار

“Tosh bilan istinjo qilishning o‘zi bilan kifoyalanish axlat yoki bavl chiqqan joyidan tashqariga yoyilmagan holatda joiz bo‘ladi. Agar axlat yoki bavl najosat o‘rnidan atrofiga dirham miqdoridan ko‘p yoyilsa, suv bilan yuvish farz bo‘ladi. Tosh bilan ketkazish kifoya qilmaydi” (“Fatovoi Olamgiriya” kitobi).

Suyuqlikdan boshqa barcha narsalar, hatto u nam narsa bo‘lsin, tosh bilan bir xil hukmda bo‘ladi. Vallohu a’lam.

O‘zbekiston musulmonlari idorasi
Fatvo markazi.