Alloh taolo: “Ey payg‘ambar, sizga Parvardigoringiz tomonidan nozil qilingan narsani yetkazing! Agar qilmasangiz, Uning elchiligini yetkazmagan bo‘lursiz, Alloh Sizni odamlardan saqlagay. Albatta, Alloh kofir qavmni hidoyat qilmas” – Moida surasi, 67-oyat.

Bu oyatda Alloh taolo O‘z payg‘ambarini odamlarning zararidan himoya qilishini ta’kidlagan. Islom tarixidan ma’lumki, Nabiy alayhissalomning himoyasi sahobalar orqali ham bo‘lgan, ya’ni U zotning qo‘riqchilari bor edi.

Bu oyat nozil bo‘lgach, Rasululloh sollallohu alayhi vasallam sahobalariga, Alloh taolo mening himoyamni o‘z zimmasiga oldi, deb xabar bergan. Bu hadisni Imom Termiziy rahmatullohi alayh “Sunani Termiziy”da rivoyat qilgan, 3046-hadis.

Rasululloh sollallohu alayhi vasallamni Alloh taolo tomonidan himoya qilinishlari mo‘jizalardandir.

Oyat nozil bo‘lgunga qadar quyidagi mashhur sahoba roziyallohu anhum Nabiy alayhissalomning qo‘riqchilari edi:

• Sa’d ibn Muoz roziyallohu anhu;
• Muhammad ibn Maslama roziyallohu anhu;
• Zubayr ibn Avvom roziyallohu anhu;
• Mug‘iyra ibn Shu’ba roziyallohu anhu;
• Abu Ayub Ansoriy roziyallohu anhu;
• Sa’d ibn Abu Vaqqos roziyallohu anhu;
• Bilol ibn Raboh roziyallohu anhu;
• Zakvon ibn Abdul Qays roziyallohu anhu.

Alloh barchalaridan rozi bo‘lsin.

Po‘latxon Kattayev,
TII Hadis va islom tarixi fanlari kafedrasi katta o‘qituvchisi