SHAYX NURIDDIN XOLIQNAZAR: TABIAT — ALLOHNING OMONATIDIR!
Butunjahon global sammitida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari nutq so‘zlab, dunyoda iqlim o‘zgarishi oqibatida harorat ko‘tarilishi, sahrolar kengayishi, chang-to‘zon, suv toshqinlari va qum bo‘ronlari kabi tabiat hodisalari sodir bo‘layotganini xavotir bilan ta’kidlash barobarida har bir inson Allohning omonati bo‘lgan tabiatga oqilona munosabatda bo‘lishiga chaqirdilar.
Mamlakatimizda iqlim o‘zgarishi oqibatlarini bartaraf etish, tabiiy boyliklardan samarali foydalanish hamda biologik xilma-xillikni yanada boyitishga qaratilgan amaliy sa’y-harakatlarga Muftiy hazrat alohida to‘xtaldilar. Zero, Alloh taolo Yer yuzini obod qilish insonlar zimmasidagi muhim vazifa ekanini ta’kidlab, Qur’oni karimdagi “U sizlarni yerdan paydo qildi va unga sizni obod qilish uchun joylashtirdi” (Hud surasi, 61-oyat) oyati karimaning mazmun-mohiyatini izohladilar. Shuningdek, Nabiy alayhissalomning “Zarar qilish ham, zarar ko‘rish ham yo‘q” (Imom Ahmad rivoyati), degan hadisi shariflarini keltirdilar.
Shuningdek, Muftiy hazratlari yurtimizda aholining ekologik madaniyatini yuksaltirish, tabiatga yetkazilayotgan zararlarning oldini olish maqsadida, ulamolar va imom-xatiblar tomonidan mahallalar, ta’lim muassasalarida uchrashuvlar o‘tkazilayotgani, masjidlarda esa ma’vizalar qilinayotgani kabi tajribalar bilan o‘rtoqlashdilar.
Sammit ishtirokchilari mamlakatimiz diniy soha xodimlarining iqlim o‘zgarishini oldini olishdagi faolliklariga yuqori baho berdi.
O‘zbekiston musulmonlari idorasi
Matbuot xizmati
Iordaniya OAV: Toshkentda Islom sivilizatsiyasiga bag‘ishlangan xalqaro mediaforum o‘tkaziladi
Iordaniyaning nufuzli “Jordan News Agency” (Petra) axborot agentligi hamda “Hala Ahbar” nashrida 24–29 avgust kunlari Toshkent shahrida bo‘lib o‘tadigan “Islom sivilizatsiyasi: yangi nigoh va kashfiyotlar” mavzusidagi xalqaro mediaforumga bag‘ishlangan maqolalar e’lon qilindi, deb xabar bermoqda “Dunyo” AA.
Agentlikda yozilishicha, mazkur yirik xalqaro tadbir O‘zbekistonning jahon media hamjamiyati bilan aloqalarini yanada kengaytirish, jurnalistlar va soha mutaxassislari o‘rtasida tajriba almashishni rivojlantirishi bilan ahamiyatlidir.
Shu bilan birga, forum davomida islom sivilizatsiyasining boy ilmiy-ma’rifiy va madaniy merosini zamonaviy media vositalari orqali keng targ‘ib etishga alohida e’tibor qaratiladi.
Forumning asosiy tadbirlari O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar hamda media sohasi mutaxassislari ishtirok etadi.
Nashrlar forum dasturining mazmun-mohiyatiga alohida e’tibor qaratgan. Xususan, tadbir doirasida yalpi majlislar, ixtisoslashtirilgan media-ko‘rgazmalar, matbuot brifinglari va ikki tomonlama uchrashuvlar tashkil etiladi.
Munozaralarda hujjatli filmlar yaratish, tarixiy xotirani asrash va yoritish, nashriyot loyihalarini rivojlantirish, zamonaviy texnologiyalardan media sohasida samarali foydalanish hamda xalqaro media loyihalarni amalga oshirish istiqbollari muhokama qilinadi.
Nashrning qayd etishicha, tadbirning muhim jihatlaridan biri – O‘zbekistonlik talabalar uchun xalqaro media sohasining tajribali mutaxassislari ishtirokida amaliy master-klasslar o‘tkazilishidir. Bu mashg‘ulotlar zamonaviy jurnalistika, mediamahsulotlar yaratish va xalqaro axborot makonida samarali faoliyat yuritish bo‘yicha bilim va ko‘nikmalarni oshirishga xizmat qiladi.
Iordaniya OAVda forum doirasida ishtirokchilar uchun Samarqand shahriga safar ham rejalashtirilgani qayd etilgan. Xorijiy jurnalistlar Imom Buxoriy majmuasini ziyorat qilib, Samarqandning boy tarixiy-madaniy merosi bilan tanishadilar. Toshkent shahrida esa xalqaro OAV vakillari uchun maxsus mediatur tashkil etiladi.
Bunday safarlar forum ishtirokchilariga O‘zbekistonning nafaqat zamonaviy taraqqiyoti, balki uning jahon sivilizatsiyasi tarixidagi o‘rni, ilmiy-ma’rifiy an’analari va boy madaniy merosi haqida bevosita tasavvur hosil qilish imkonini beradi.
Maqolalarda xalqaro mediaforumning 28 avgust kuni yakuniy yalpi majlis va rasmiy yopilish marosimi bilan yakunlanishi ham ma’lum qilingan. Xorijiy mehmonlar O‘zbekiston Respublikasi davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlar idorasi Matbuot xizmati
- «
- »