«Vaqf» xayriya jamoat fondining Farg‘ona viloyati filiali fidoiy volontyorlar guruhi, saxovatpesha homiylar hamrohligida Qo‘shtepa tumanida yashab kelayotgan boquvchisi yo‘q oilaning mushkulini oson qilishdi. Ko‘p yillardan buyon bir xonali uyda, og‘ir sharoitalarda yashab kelayotgan oilaga barcha sharitlarga ega, to‘liq jihozlangan hovli-joy yangidan qurib berildi. 

Mehmonxona, yotoqxona, oshxona va hamomdan iborat bu yangi uy ona va uning uch nafar farzandi uchun haqiqiy sovg‘a bo‘ldi, deyish mumkin. Shuningdek, mazkur oilaga homiylar tomonidan kir yuvish mashinasi, gaz plitasi, pishiriq pechi va kitoblar ham hadya qilindi. Yana bir ko‘ngilni ravshan qiladigan jihati, oila bir-necha yillardan buyon ichimlik suvidan qiynalar, uni ancha olisdan tashib kelib iste’mol qilishardi. Endilikda bu muammo ham hal etildi. Ikki kilometrdan toza ichimlik suvi quvuri tortib kelindi. Shuningdek, hovli etagi asfaltlanib, mahalla ko‘chasiga shag‘al yotqizildi.

Yangi hovli-joyni o‘z egalariga topshirish marosimida «Vaqf» xayriya jamoat fondi boshqaruvi rahbari o‘rinbosari Jahongir Salamov, fondning Farg‘ona viloyati filiali rahbari Baxtiyor Qirg‘izov, Qo‘shtepa tumani hokimi A.Abdullayev va boshqalar ishtirok etishdi. Mazkur oilaga, yurtimizga tinchlik-omonlik, fayz-baraka, faravonlik tilab duoyi xayrlar qilishdi.

Bir ehtiyojmand, boquvchisi yo‘q oilaga xursandchilik ulashgan saxovatpesha homiylarimizdan, fidoiy volontyorlarimizdan Alloh taolo rozi bo‘lsin! Bu ezgu amallari uchun ularni O‘zi ulkan ajr-savoblar bilan mukofotlasin.
Imkon borida ehson qilishga shoshiling. Telefoningizdan osongina ehson qiling. 

Vaqf.uz