#yil_imomi #tanlov
Bugun, 13 noyabr kuni Respublikamiz masjidlarida faoliyat yuritayotgan imom-xatib va noiblar ishtirokida intiqib kutilgan “Yil imomi – 2024” ko‘rik-tanlovining yakuniy bosqichi bo‘lib o‘tdi. Unda Qoraqalpog‘iston Respublikasi, viloyatlar va Toshkent shahri bosqichlarida g‘oliblikni qo‘lga kiritgan 14 nafar imom domla o‘zaro bellashdi.
Nufuzli musobaqa ishtirokchilari Qur’oni karim qiroati va tafsiri, aqida, fiqh, Islom tarixi, hadis ilmlari, allomalar ijodiga oid savollarga javob berdilar. Shuningdek, mehnat faoliyatlari davomida amalga oshirgan salmoqli ishlari va OAVlarida e’lon qilingan ijodlarini namoyish etdilar.
Qatnashchilarning chiqishlari hakamlar hay’ati tomonidan mezonlar asosida baholandi.
Tanlov natijalariga ko‘ra, quyidagi ishtirokchilar sovrinli o‘rinlarga munosib deb topildi:
1-o‘rin – Namangan viloyati “Homiddin qori” jome masjidi imom-xatibi Muhammad Bobir domla Nasriddinovga I darajali diplom va Haj safari yo‘llanmasi;
2-o‘rin – Toshkent shahridagi “Firdavs” jome masjidi imom-xatibi Baxtiyor domla Sattorovga II darajali diplom va 16 mln. so‘m pul mukofoti;
3-o‘rin – Toshkent viloyati “Chanoq” jome masjidi imom-xatibi Yoqub domla Buxarbayevga III darajali diplom va 13 mln. so‘m pul mukofoti topshirildi.
Shuningdek, tanlovning "Yilning eng fidoiy imomi" Qoraqalpog‘iston Respublikasi “Mulla Is'hoq” jome masjidi imom-xatibi Altinbek domla Zinullayev va Xorazm viloyati “Mirhoshim bobo” jome masjidi imom-xatibi Ollabergan domla G‘oyipovga nasib etdi.
Musobaqa yakunida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari “Yil imomi – 2024” sohibiga Haj yo‘llanmasini topshirish asnosida ezgu tilak va xayrli duolarni bildirdilar.
Tanlovning barcha ishtirokchilariga qimmatbaho sovg‘alar taqdim etildi.
Alloh taolo g‘oliblarga mukofotlarni muborak aylab, barcha ishtirokchilarning kelgusi faoliyatiga muvaffaqiyatlar ato etsin.
O‘zbekiston musulmonlari idorasi
Matbuot xizmati
MUSLIM.UZ
IQNA sayti xabariga ko‘ra, Misrdagi mashhur “Qur’on karim” radioeshittirishi rahbari Ismoil Duvaydar uzoq tanaffusdan so‘ng mashhur “Mus'haf muallim” dasturi yana efirga qaytganini ma’lum qildi. Dastur har kuni mahalliy vaqt bilan soat 09:45 da efirga uzatiladi. Uni Sa’d al-Mut’aniy olib boradi.
Ushbu dastur Qur’on karimni yangi o‘rganayotgan va yod olishni istagan kishilar uchun mo‘ljallangan bo‘lib, unda tajvid qoidalariga muvofiq to‘g‘ri talaffuz o‘rgatiladi. Dasturda Shayx Mahmud Xalil Husariyning tilovatlari asos qilib olingan.
Shuningdek, Qur’on karim radioeshittirishi Misr Vaqflar vazirligi bilan hamkorlikda har kuni diniy tanlov ham o‘tkazmoqda. G‘oliblardan ikki nafariga 2 500 misr funti miqdorida mukofot beriladi. Tinglovchilarning savoliga javobni (sura va oyat raqami) vazirlikning “Facebook” sahifasidagi maxsus havola orqali yuborishlari lozim.
Ismoil Duvaydar ta’kidlashicha, radioeshittirish hozirda Misrning yetuk qori va mashhur ulamolari marhum shayx Abdufattoh Sha’sha’iyning ilgari efirga uzatilmagan noyob tilovatlarini ham taqdim etmoqda. Bu tilovatlarni shayxning oilasi radioeshittirishga sovg‘a qilgan.
Shuningdek, shayx Mustafo Ismoilning nabirasi tomonidan berilgan 18 ta noyob tilovat ham ushbu boy jamg‘armaga qo‘shildi. Shu bilan birga, Shayx Muhammad Rif’at, Shayx Abdulbosit Abdussomad va Shayx Muhammad Tabloviy kabi mashhur yetuk qorilarning tilovatlari ham efirda yangramoqda.
Ilyosxon Ahmedov,
tayyorladi.