Britaniyaning mashhur "London Post" yangiliklar portalida "O‘zbekistonning me’moriy renessansi: tarix va modernizm uyg‘unligi" sarlavhali maqola e’lon qilindi, deb xabar bermoqda "Dunyo" AA muxbiri.
 

Unda Markaziy Osiyoda joylashgan O‘zbekiston boy tarixiy merosni zamonaviy shaharsozlik tamoyillari bilan uyg‘unlashtirgan holda hayratlanarli me’moriy me’moriy renessans davrini boshidan kechirayotgani ta’kidlangan.

Qayd etilishicha, O‘zbekistonning me’moriy o‘ziga xosligi juda rang-barang. "Mamlakatning qadimiy shaharlari islom arxitekturasining eng yaxshi namunalari bilan faxrlanadi. Ulardagi murakkab koshinlar, geometrik naqshlar va monumental gumbazlari hayratlanarlidir", – deyilgan nashrda.

O‘zbekistonning tarixiy obidalarida qadimiy an’analar markaziy o‘rinni egallagan bo‘lsada, mamlakat modernizmni ham qabul qildi. 2016 yildan boshlab zamonaviy arxitekturaning yangi to‘lqini boshlandi, bu Alisher Navoiy nomidagi xalqaro ilmiy-tadqiqot markazi va "Toshkent-Siti" loyihasi kabi yirik tuzilmalarning paydo bo‘lishiga olib keldi.

Maqolada ushbu loyihalar O‘zbekistonni innovatsiyalar markazi sifatida jahon miqyosiga olib chiqish, shu bilan birga mamlakatning boy me’moriy merosini asrashga qaratilgani alohida ta’kidlangan. Poytaxtda osmono‘par binolar va zamonaviy ofis binolari qadimiy obidalar bilan uyg‘un holda qad rostlamoqda.

"Barqarorlik – O‘zbekistonda me’moriy renessansning yana bir muhim tarkibiy qismidir. Zamonaviy texnologiyalar qo‘llanilar ekan, Ipak yo‘li davridagi an’anaviy qurilish metodlari ham qayta ko‘rib chiqilmoqda", – deb ta’kidlangan.

Maqola yakunida, "O‘zbekiston me’moriy renessansi tez o‘zgarib borayotgan dunyoda madaniy merosni asrab-avaylashda boshqa mamlakatlar uchun namuna bo‘lib, tarix va modernizm o‘rtasida uyg‘un munosabatni saqlab kelmoqda", – deb yozilgan.

O‘zbekiston musulmonlari idorasi
Matbuot xizmati