Bugun, 28 sentyabrdan boshlab O‘zbekiston musulmonlari idorasida xalqaro miqyosdagi tajvid ustozi, o‘n qiroat ilmi bo‘yicha dunyoning eng ko‘zga ko‘ringan ulamolaridan biri – doktor Shayx Ayman Suvayd hazratlarining yurtimizdagi qiroat ilmi ustozlari uchun mahorat darslari boshlandi.

Ushbu maxsus o‘quvlarda O‘zbekiston musulmonlari idorasi tasarrufidagi oliy va o‘rta maxsus ta’lim muassasalari hamda «Qur’oni karim va tajvid» kurslarining pedagog-o‘qituvchilari ishtirok etmoqda. Bundan ko‘zlangan asosiy maqsad – yurtimizdagi tajvid muallimlarining kasbiy mahoratini oshirish va bu boradagi ilg‘or xalqaro standartlarni yurtimiz diniy ta’lim tizimiga keng joriy qilishdir.

Darslar Shayx Ayman Suvaydning 40 yillik ilmiy izlanishlari mahsuli bo‘lgan va butun dunyoda keng ommalashgan «at-Tajvid al-Musovvar» (Suratli tajvid) asari asosida olib borilmoqda.

Mashg‘ulotlar tizimli va yangicha uslublarda tashkil etilmoqda: kunning birinchi yarmida olim tomonidan tajvid qoidalari bo‘yicha chuqurlashtirilgan nazariy bilimlar va qoidalar tushuntirilmoqda. Kunning ikkinchi yarmida esa tinglovchilar o‘zlashtirgan bilimlari bo‘yicha bevosita ulamoning o‘ziga vazifalar topshirmoqda. Bu esa har bir qoidaning to‘g‘ri va benuqson o‘zlashtirilishini kafolatlaydi.

Soha vakillarining kasbiy mahoratini oshirish va xalqaro tajribani ommalashtirishga qaratilgan maxsus o‘quvlar davom etmoqda.

O‘zbekiston musulmonlari idorasi Matbuot xizmati