O`zbekiston musulmonlari idorasi

Kechasi ko‘chada yurishning zararlari

13.12.2024 8530 2 min.

Ibn Umar roziyallohu anhumodan rivoyat qilinadi. Rasululloh sollallohu alayhi vasallam: “Agar odamlar yolg‘izlikda nimalar borligini men bilganchalik bilganlarida edi, birorta ham otliq tunda yolg‘iz yurmasdi”, dedilar (Imom Buxoriy rivoyati).

Ushbu hadisi sharifda Rasululloh sollalloh alayhi vasallam kechasi yolg‘iz yurishdan qaytarmoqdalar. Chunki uning bir qancha zararlari bor, ammo odamlar ularning hammasini ham anglab yetmaydilar. Shu sababli, Rasululloh sollallohu alayhi vasallam insonlar bilmagan yomonliklarni bilganlari uchun undan ogohlantirmoqdalar.

Bugungi kunda ota-ona nazorati va e’tiborisiz qolgan juda ko‘plab yoshlarning ushbu hadisga amal qilmay, kechasi bilan ko‘chalarda, kafe-bar, internet klublarda sang‘ib yurishlari, tongga qadar vaqtlarini behuda va bekorchi ishlarga sarflashlari kuzatilmoqda.

Eng xavfli va ayanchli jihati – yarim tunda bunday ko‘cha daydishlarning oxir-oqibati turli jinoyatlar, qotilliklar, mushtushzo‘rliklar bilan yakun topmoqda. Qolaversa, turli ruhiy kasalliklarga duchor bo‘lganlarning aksariyati aynan bemahalda ko‘chada sang‘ib yurganlar tashkil etishini unutmaslik kerak.

Shuningdek, tunni bekorchilik bilan o‘tkazish inson salomatligi uchun ham jiddiy zarar ekanini ta’kidlab o‘tish lozim. Buyuk Britaniya olimlarining 90 mingga yaqin ko‘ngilli qatnashgan, olti yil davom etgan taqdiqotlari natijasiga ko‘ra soat 22⁰⁰ dan 23⁰⁰ gacha bo‘lgan vaqt oralig‘ida uyquga yotish yurak-qon tomir kasalliklari xavfini sezilarli darajada kamaytirishi aniqlangan (European Heart Journal – Digital Health, Volume 2, Issue 4, December 2021, Pages 658–666).

Demak, shariat ko‘rsatmasiga amal qilgan banda dunyo va oxirati uchun foydali bo‘lgan amallarga yaqin, noxush va zararli holatlardan esa uzoq bo‘ladi. Alloh taolo O‘zining roziligini topadigan solih amallarda bardavom qilsin!

Davron NURMUHAMMAD