27 oktyabr kuni yurtimizda O‘zbekiston Respublikasi Qonunchilik palatasi va mahalliy kengashlarga deputatlik saylovi o‘tkazildi. Saylov jarayonlarini kuzatish uchun bir qator xorijiy davlatlardan eskpertlar tashrif buyurdi. Mazkur jarayonda Iordaniya mamlakati delegatsiyasini Muftiy haratlari boshchigidagi Diniy idora xodimlari kutib olib, mehmonlarga saylov jarayonlarini kuzatish uchun barcha sharoitlarni hozirlab, ularga hamrohlik qildi. Shu munosabat bilan Iordaniya delegatsiyasi Muftiy hazratlari nomiga tashakkurnoma yo‘lladi.
O‘zbekiston musulmonlari idorasi raisi, muftiy, fazilatli Shayx Nuriddin Xoliqnazar hazratlariga
TASHAKKURNOMA
Assalomu alaykum va rohmatullohi va barokatuhu
O‘zbekiston Respublikasidagi parlament saylovlarini kuzatish uchun taklif etilgan Iordaniya delegatsiyasi sifatida sizlarning mamlakatingizga tashrif buyurish va ko‘plab davlatlardan kelgan delegatsiyalar bilan birga saylovlarni kuzatishda ishtirok etish sharafiga muyassar bo‘ldik.
Tashrif davomida O‘zbekiston Respublikasida barcha sohalarda yutuqlarga erishilayotganining guvohi bo‘ldik.
Bizni mehr-muhabbat, hamkorlik va tinchlikda birlashtirgan diniy va tarixiy merosga asoslangan, qalblarimizga aziz bo‘lgan hamda yurtimiz Iordaniyaga do‘st sanalgan ushbu davlat bilan tanishish imkoniyatini berganingiz uchun samimiy tashakkurimizni izhor etamiz.
Shuningdek, tashrif davomida bizga ko‘rsatilgan barcha qulayliklar hamda delegatsiyamizga ko‘rsatgan samimiy saxovatingiz, mehmondo‘stligingiz va alohida e’tiboringiz uchun chin qalbdan samimiy minnatdorchiligimizni bildiramiz.
Xususan, Toshkent shahridagi jome masjid imom-xatibi g‘ayratli Nurali Mavlonovga tashrifimizni yengillashtirish va arab tiliga tarjima qilishdagi yordamini alohida e’tirof etmoqchimizki, uning sa’y-harakatlari tufayli yurtingiz va xalqingiz haqida yaxshiroq tushunchaga ega bo‘ldik.
Fursatdan foydalanib, Toshkent xalqaro aeroportiga yetib kelganimizdan boshlab, ehtirom ko‘rsatilgan holda mamlakatingizdan chiqib ketgunga qadar bizga hamrohlik qilgan barcha tashkilotchilarga samimiy minnatdorchilik bildiramiz.
Barchangizga tashakkur. Alloh taolo sizlarga dinga xizmat qilish yo‘lida muvaffaqiyatlar ato etsin.
Barcha sohalarda hamkorligimizni rivojlantirishni umid qilib qolamiz.
Mustaqil saylov komissiyasi vakili,
Iordaniya delegatsiyasi rahbari
Jihod al-Mumniy
7 iyul kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtiroklarida Oliy va o‘rta maxsus islom ta’lim muassasalari uchun 2025-2026 o‘quv yili qabul imtihonlariga tayyorgarlik ishlari muhokama qilindi.
O‘zbekiston musulmonlari idorasi raisi o‘rinbosari, professor Muhammadolim domla Muhammadsiddiqov diniy ta’lim muassasalari uchun yangi o‘quv yili kirish imtihonlarini tartibli o‘tkazish yuzasidan amalga oshirilgan ishlar to‘g‘risida axborot berdi.
Muftiy hazratlari imtihonlarni adolatli va xolisona o‘tkazish, tartib-qoidalarga rioya etish, jarayonlar shaffof bo‘lishiga erishish hamda tegishli xonalar xavfsizligini ta’minlash, videokuzatuv kameralari bilan jihozlash kabi muhim jihatlarga diqqat qaratdilar. Shuningdek, imtihondan oldin abituriyentlar bilan o‘tkaziladigan suhbatlar ham belgilangan tartibda bo‘lishiga urg‘u berdilar.
Shayx Nuriddin Xoliqnazar hazratlari imtihonlarni ochiq-oshkora va adolatli o‘tkazish orqali yosh avlod haq-huquqlarini ta’minlash, iqtidorli yoshlarga bilimlarini namoyon etishga imkoniyat berishni qayd etdilar. Shuningdek, imtihon olishga mas’ul ustoz va mutaxassislar Alloh taolo huzurida ham, xalqimiz oldida ham ulkan mas’uliyatni chuqur his etishi hamda nomaqbul illatlardan saqlanishlariga katta diqqat qaratdilar.
Madrasalarga kirish imtihon savollari umumta’lim maktab dasturlari asosida, Oliy diniy ta’lim muassasalari uchun kirish imtihon savollari esa madrasa ta’lim dasturlari asosida bo‘lishi ham alohida ta’kidlandi.
Yig‘ilish yakunida quyidagi muhim vazifalar belgilab olindi:
– Qabul jarayonlarini namunali tashkil etish;
– Yuqori darajada xavfsizligi ta’minlangan elektron dasturlardan foydalanish;
– Abituriyentlar uchun munosib sharoitlarni yaratish;
– Abituriyentlarga test sinovlaridagi huquq va majburiyatlarini tushuntirish;
– Imtihon jarayonini videokuzatuv qurilmalari orqali nazorat qilish;
– Ota-onalar uchun kutish joylarini tayyorlash;
– Imtihon jarayonlarini namoyish etish uchun ekranlar o‘rnatish.
Qabul imtihonlari muvaffaqiyatli o‘tishini tilab duolar qilindi.
O‘zbekiston musulmonlari idorasi Matbuot xizmati