Hech qachon o‘ylab ko‘rganmisiz, nima uchun ba’zi kishilar ulkan yutuqlarga erishadi, ba’zilar esa bir xil holatdan chiqa olmaydi? Buning siri biror bir sehr-jodu yoki omadga bog‘liq deb o‘ylaysizmi? Aslo, buning sababi oddiy va ayni paytda hammaga bu imkoniyat berilgan. U ham bo‘lsa - tong!
Tongingiz to‘liq bir kuningizni yo‘nalishlarini aniqlab beradigan kompasdir. Agar kuningiz faol harakat va aniq reja bilan boshlansa, kun davomida oldingizda ulkan imkoniyatlar eshiklari ochiladi. Bordiyu, tongingiz betartib va rejasiz boshlansa, bu kuningizning qolgan qismiga o‘zining salbiy ta’sirini ko‘rsatishi tabiiydir.
Tong vaqti shunchaki yangi kunning boshlanish vaqti emas. Balki bu vaqt kuningizni yutuqlar bilan o‘tkazasizmi yoki samarasiz ketkazasizmi, shularni belgilab olish lahzasidir. Qanday qilib deysizmi?
Mutaxassislarning ta’kidlashlaricha, tong vaqti kun tartibini belgilash, energiyani oshirish va aqlni rivojlantirish uchun eng yaxshi vaqtdir. Asosiysi, tongingizni shoshma-shosharlik bilan yoki betartiblik bilan boshlamang. Tong vaqti bu sizning kichik bo‘lsada sarmoyangiz, u sizning shaxsiy va ijtimoiy hayotingizda katta samara berishi mumkin.
Eng muvaffaqiyatli insonlarning aksariyatida tongda bajaradigan muayyan mashg‘ulotlari mavjudligini bilasizmi? Tonggi mashg‘ulotlarga rioya qilish sizda quyidagi ko‘nikmalar hosil bo‘lishiga yordam beradi:
1. Aniq maqsad bilan uyg‘onish.
2. Chalkashliklardan xalos bo‘lish.
3. Ijobiy maqsadlar sari odimlash, kunni unumli o‘tkazish uchun zamin yaratish.
Payg‘ambarimiz alayhissalomdan vorid bo‘lgan tongda aytiladigan duo va zikrlarning ma’no va mazmunlariga bir e’tibor bering-a. Unda insonni hotirjam qiladigan, hayotdan unumli foydalanishga undaydigan, har bir ishda faqat Uning o‘ziga tavakkul qilishga chaqiradigan ma’nolar bor. Demak, har tongni mana shunday g‘oya va aqida bilan boshlashga odatlangan kishining kunida baraka va rivojlanish bo‘ladi, inshaalloh. 

Tongni muvaffaqiyatli boshlashning beshta asosiy unsuri bor:
1. Erta uyg‘onish: bunda siz tafakkur qilish, ishlarni rejalashtirish va sokin vaqtdan bahramand bo‘lish imkoniga ega bo‘lasiz.
2. Jismoniy mashqlar: namoz o‘qish va hatto yengil badantarbiya mashqlarini bajarish ham qon aylanishini yaxshilab, tanaga quvvat (energiya) beradi.
3. Hayot (tiriklik) haqida fikr yuritish, ne’matlarga shukr qilish.
4. Kunlik rejani belgilab olish.
5. Sog‘lom ovqatlanish: erta tongda qilingan nonushta kun davomida faol bo‘lish uchun zarur energiyani beradi.

Ertadan boshlab kuningizni shu tarzda boshlang va hayotingizda qanday ijobiy o‘zgarishlar bo‘lishini o‘zingiz kuzating.
Har kuningizni tong sahardan boshlashga odatlaning, kuningiz barakali, ishlaringiz muvaffaqiyatli bo‘ladi. Zero, Payg‘ambarimiz sollallohu alayhi vasallam biz ummatlari haqqiga Allohdan tongimizga baraka so‘rab duo qilganlar.
 

Homidjon domla ISHMATBЕKOV