Abu Hurayra roziyallohu anhudan rivoyat qilinadi. Rasululloh sollallohu alayhi vasallam: "Mo‘minning ruhi uning qarzi to‘lanmaguncha ushlab turiladi", dedilar (Imom Termiziy rivoyati).

Hadisdan olinadigan foydalar:
1. Musulmon inson vafotidan oldin qarzlarini to‘lashga harakat qilishi lozim. Agar bunga qodir bo‘lmasa, uning qarzini vorislari merosdan to‘laydi. Meros bo‘lmasa, o‘z yonlaridan to‘lasalar ham bo‘ladi. Agar ular ham qodir bo‘lmasa, musulmonlardan imkoni bor insonlardan birortasi bunga harakat qilishi kerak.

2. Shariat odamlarga bo‘lgan haqlarga e’tiborsizlik qilishdan, xususan, qarzni o‘z vaqtida bermaslikdan ogohlantirgan. Musulmon inson Allohdan yordam so‘rab, o‘z qarzlarini imkon qadar tezroq uzishga harakat qilishi kerak, shunda u vafot etganida zimmasida hech kimning haqqi qolmaydi.

Abdulmuqsid Po‘latov,
Hadis ilmi maktabi talabasi.