Hadisi sharifda, Alloh taolo ro‘zadorga iftor vaqtida nima so‘rasa, ato qilishi aytilgan. Yaxshi, agar biror banda o‘sha vaqtda hech narsa so‘ramasa, u holda u nimaga erishadi?

Bizning aksar onalarimiz, opa-singillarimizning holatlari aynan shundayki, iftorlik narsalarini tayyorlashda va dasturxon bezashda shunday band bo‘ladilarki, ularga “Hoy, iftorlik vaqti bo‘lib bo‘ldi, siz ham iftor qilib oling”, deyishga to‘g‘ri keladi.

Ayollar iftorlik narsalari yarim soat oldin tayyor qilinib, dasturxonga qo‘yib qo‘yilganini erlariga tushuntirishlari kerak. Oxirgi yarim soatda biz oshxonada o‘choq tepasida turishimiz o‘rniga va nimalardir qovurilyapti, ba’zan nimalardir pishyapti, bu ishlar bilan band bo‘lish o‘rniga, ushbu oxirgi yarim soat yoki yigirma daqiqa joynamozda o‘tirib, Robbimizga duolar qilib olaylik.

Ayollar uylaridagi barcha yosh bolalarni oldilariga o‘tkazib olsinlar va gunohdan pok bolajonlarga aytsinlarki, ular ham qo‘llarini ko‘tarib duo qilsinlar. Agar kattalar gunoh qilgan bo‘lsalar, yosh bolalar gunohdan pokdilar. Kim bilsin, ushbu gunohdan pok qo‘llar ko‘tarilgach, Alloh  taolo rahm qilib, sizning duolaringizni qabul qilar.

Shuning uchun ayollar iftorning ushbu vaqtlarini qadrlashlari kerak. Agar biror uyda faqat birgina ayol bo‘lsa va u taom pishirishi ham zarur bo‘lsa, u holda duo qo‘l bilan emas, qalb bilan qilinadiki, shunga ko‘ra, qo‘l ish bilan mashg‘ul bo‘lsin va siz ushbu holatda ham qalbingizda Alloh taologa duolar qilayotgan bo‘lsangiz, demak, siz ham ushbu vaqtda Alloh taolodan so‘ragan narsangizga erisha olasiz.

Hazrati Zulfiqor Ahmad Naqshbandiy hafizahulloh