Ahli ilm va solihlarga muhabbat qiling va davralarida bo‘ling. Shoyad, shafoatlari yetsa:

Imom Shofeiy rahimahulloh aytadilar:

Solihlarni sevaman, garchi ulardan emasman,
Shoyad, ular orqali shafoatga erishsam.
Tijorati gunoh bo‘lganlarni suymasman,
Garchi ular kabi tijoratim(iz) bir bo‘lsa ham.

Yazid ibn Horun rahimahulloh aytadilar: “Muhammad ibn Yazid Vositiy vafot etgach, tushimda uni ko‘rdim va:

“Alloh sizga qanday muomala qildi?” deb so‘radim.

“U Zot meni mag‘firat qildi” dedi.

“Nima uchun?”, deb so‘radim. U bunday dedi:

“Juma kuni asr namozidan keyin bir majlisda edik. Abu Amr va Hasan Basriy rahimahumulloh ham kelib, duo qilishdi, biz “omin” deb turdik. Shu tufayli mag‘firat qilindik”.

Sufyon ibn Uyayna rahimahulloh aytadilar: “Otam o‘n besh yoshga to‘lganimda menga: “Ortiq yosh bola emassan. Yaxshilik ortidan bor, shunda solih kishilar qatorida bo‘lasan”, dedilar. Shundan beri maslahatlaridan chiqmadim” (Ibn Javziy, Soydul Xotir).