#O'quv_seminar

Ijtimoiy-ma'naviy muhit barqarorligini ta'minlashga barcha mas'ul. Bu ishdan hech kim chetda turmasligi kerak. Zero, shu aziz Vatanda tinch-totuv, rohat-farog'atda yashash bevosita tinchlik-osoyishtalikka bog'liq.

Bugun, 29 fevral' kuni Toshkent shahridagi "Shayx Zayniddin" jome masjidi majlislar zalida poytaxtimizda faoliyat yuritayotgan otinoyilar va tumanlar targ'ibot guruhlari mutaxassislari ishtirokida o'quv-seminari tashkil etildi.

Tadbirni Toshkent shahar bosh imom-xatibi o'rinbosarlari Abdulloh domla Yo'ldoshev hamda Ergashali domla Rustamov kirish so'zi bilan ochib berdilar.

Ular bugungi kunda diniy soha hodimlari, shu jumladan, otinoyilarning mas'uliyati, ijtimoiy-ma'naviy muhit barqarorligini ta'minlashdagi o'rni, jamiyat rivojida ularning vazifalari, turli yot g'oyalar ta'siridan xalqimizni himoya qilish, sof Islom dini ta'limotining asl mohiyatini keng ommaga etkazish va jaholatni ilm-ma'rifat bilan engish mumkinligi haqida to'xtalib o'tdi.

Kun tartibidagi masalalar yuzasidan O'zbekiston xalqaro islom akademiyasi Yoshlar bilan ishlash va ma'naviyat bo'limi boshlig'i Munira Qahhorova Prezidentimiz Shavkat Mirziyoev raisligida 2023 yil 22 dekabr' kuni Respublika Ma'naviyat va ma'rifat kengashining kengaytirilgan yig'ilishida bildirilgan ustuvor yo'nalishlar haqida to'xtalib o'tdi. Davlatimiz rahbari Ibrat domlaning “Ulamo g'ayrat etkanda millat, albatta, isloh topur”, degan hikmatli so'zlarini yodga oldi.

– Muhtaram Yurtboshimiz o'z nutqlarida bugun ma'naviyat boshqa sohalardan o'n qadam oldinda yurishi, ma'naviyat yangi kuchga, yangi harakatga aylanishi kerak, – dedi Toshkent shahar Olmazor tumani “Siroj solih” masjidi imom-xatibi Hasan domla Qodirov. Ma'ruzachilar bugungi kunda mazhabsizlik, mutaassiblik, ekstremizm va terrorizm masalasi musulmon dunyosidagi eng global muammoga aylanib borayotgani, bularning oldini olishda mutaassiblikka moyilligi bor, yot g'oyalar ta'siriga berilgan xotin-qizlarni uyma-uy yurib, mahallabay o'rganish mexanizmi yordamida ular bilan psixologik seminar-treyninglar o'tkazishning tamoyillari va usullari haqida batafsil tushunchalar berishdi.

Seminar ma'ruza-amaliy mashg'ulot tarzida o'tkazilganligi bois, savol-javob usulidan foydalanildi. Shuningdek, otinoyilarning savollariga Toshkent shahar bosh imom-xatibining xotin-qizlar masalalari bo'yicha yordamchisi Zulayho Soatova javoblar berdi, fikr-mulohaza va takliflar tinglandi. 

O'zbekiston musulmonlari idorasi
Toshkent shahar vakilligi
Matbuot xizmati