Hojilar xonadonlarga chuqurroq kirib bormoqda
Shu yil 28 iyul kuni poytaxtimizning Sergeli tumanidagi «Nurul islom» jome masjidida sayyor yig‘ilish o‘tkazildi.
Tumanlar bosh imom-xatiblari, imom-domlalar, ulamolar, «Haj 2025» hojilari, mahalla faollari qatnashgan tadbirni Toshkent shahar bosh imom-xatibi Abduqahhor domla Yunusov olib bordilar.
Yig‘ilishdan so‘ng mahallalarga chiqilib, yoshi ulug‘ insonlar, o‘zgalar ko‘magiga muhtoj kishilar, ehtiyojmand, kam ta’minlangan, boquvchisini yo‘qotgan, ajirim yoqasida turgan 120 dan ortiq oilalar holidan xabar olindi.
Hududdagi ta’mirtalab ahvolga kelib qolgan bir uy Sergeli tumani imomlari, homiylar ko‘magida qayta qurib berilishi tadbirning ahamiyati naqadar ulug‘ ekanini ko‘rsatadi.
Tumandagi 350-umumiy o‘rta ta’lim maktabi uchun hojatxona qurib berish masalasi ham homiylarni jalb qilgan holda hal etildi.
Peshin namozidan so‘ng Abduqahhor domla Yunusov «Nurul islom» masjidi qavmiga «O‘zgalarga yaxshilik qilish» mavzusida mav’iza qilib berdilar.
Tadbir ko‘tarinki ruhda bo‘lib o‘tdi. Xayrli duolar yig‘ilishga o‘zgacha fayz bag‘ishladi.
MuslimShosh.uz
Navoiyda yosh diniy soha xodimlari bilan muloqot o‘tkazildi
O‘zbekiston Respublikasi Prezidentining “Yangi O‘zbekiston yoshlari — 2030” strategiyasi ijrosini ta’minlash maqsadida Navoiy viloyatida yosh imom-xatib va imom-noiblar ishtirokida “Yoshlar bilan bir kun” loyihasi tashkil etildi.
Tadbirda Navoiy viloyati bosh imom-xatibi Temurxon domla Atoyev ishtirok etib, yosh kadrlar bilan ochiq va samimiy muloqot o‘tkazdi.
Uchrashuv davomida diniy soha xodimlari oldida turgan bir qator dolzarb vazifalar muhokama qilindi. Xususan:
-
Yoshlar bilan ishlash samaradorligini oshirish;
-
Ustoz-shogird an’analarini yanada mustahkamlash;
-
Oilaviy ajrimlarning oldini olishda diniy-ma’rifiy yondashuvlarni kuchaytirish;
-
Yot g‘oya va buzg‘unchi oqimlarga qarshi ilmiy asoslangan raddiyalar berish ko‘nikmalarini shakllantirish masalalariga alohida e’tibor qaratildi.
Mazkur ochiq muloqot yosh mutaxassislarni har tomonlama qo‘llab-quvvatlash, ularning kasbiy malakasini oshirish va o‘zaro tajriba almashishlari uchun muhim maydon bo‘lib xizmat qildi.
O‘zbekiston musulmonlari idorasi
Navoiy viloyati vakilligi
Matbuot xizmati
