Bugun Buxoroi sharifda ilm va ma’rifat yo‘lida umrini sarflagan ulug‘ ustoz – Mir Arab oliy madrasasi va Mir Arab o‘rta maxsus islom ta’lim muassasasi mudarrisi, Bahouddin Naqshband jome masjidi imom-xatibi, muhtaram Abdug‘afur Razzoq Buxoriy hazratlari muborak 75 yoshni qarshi olmoqdalar.
Ustoz hazratlari umrlarining 50 yildan ortiq qismini islom dini ravnaqiga, yoshlarni tarbiyasiga va ajdodlar merosini asrab-avvaylashga bag‘ishladilar. Buxoro shahar “Xo‘ja Zayniddin” masjidida imom sifatida, shuningdek, Buxoro viloyati qozisi sifatida xalqqa xizmat qildilar. U zotning zahmatli mehnatlari, ilmga bo‘lgan sadoqatlari va tolibi ilmlarga mehribonliklari minglab shogirdlar qalbida ilhom uyg‘otdi.
Abdug‘afur Razzoq Buxoriy hazratlari nainki faqat imom-xatib va mudarris, balki haqiqiy ma’naviyat ustuni, ilm va tarbiya maydonida namuna bo‘lib kelmoqdalar. U zot xattotlik, tabobat, ilm va ma’rifat sohalarida ham o‘zining yuksak bilimi va mahoratlari bilan tanilganlar.
Haqiqatan ham, ustoz hazratlari tolibi ilmlarning peshvosi, yoshlarning haqiqiy murabbiysi, zamondosh ulamolar orasida e’tiborli va ardoqli alloma sifatida tanilganlar. U zotning har bir so‘zlari, har bir nasihatlari qalblarga nur, ilmga chanqoq yoshlar uchun esa yo‘l-yo‘riqdir.
Bugun, shu tabarruk kunlarda, ustozga uzoq-umr, sihhat-salomatlik tilaymiz. Xalqimiz, Vatanimiz va dinimiz yo‘lida yana ko‘p yillar davomida samarali xizmat qilishlarini Allohdan so‘rab qolamiz.
Ustoz, ilm yo‘lida zahmat bilan o‘tgan muborak yoshlaringiz muborak bo‘lsin!
Mir Arab oliy madrasasi
Matbuot xizmati
Mamlakatimiz mustaqilligining 34 yillik tantanalari arafasida “Vatan uchun, millat uchun, xalq uchun!” shiori ostida Jizzax viloyati masjidlarida faoliyat yuritayotgan diniy soha xodimlari o‘rtasida “Zakovat” intellektual o‘yini o‘tkazildi.
“Zakovat” o‘yini O‘zbekiston musulmonlari idorasining barcha hududiy vakilliklari doirasida o‘tkazilib, intellektual bellashuvi bilan bir qatorda sportning futbol, stol tennisi, shaxmat va shashka turlari bo‘yicha ham musobaqalar tashkil etiladi.
Jizzax viloyati bosh imom-xatibi Mehmonali domla Jabborov, viloyat hokimligi kotibiyat mudiri Nurali Raimov va boshqa mutasaddilar intellektual bellashuv boshlanishi arafasida so‘zga chiqib, yurtimiz istiqlol ayyomi munosabati bilan o‘tkazilayotgan musobaqaning ahamiyati haqida so‘zladilar hamda ishtirokchilarga omad va zafarlar tiladilar.
Mazkur musobaqa va bellashuvlar diniy soha xodimlarining aqliy va jismoniy faolligini oshirish, o‘zaro jamoaviy hamfikrligini qo‘llab-quvvatlash, hamjihatlikni mustahkamlash, ilmiy salohiyatlarini oshirish maqsadida Yoshlar ittifoqi tashkiloti hamda mahalliy hokimliklar bilan hamkorlikda tasdiqlangan dastur asosida o‘tkazilmoqda.
20 ta jamoa ishtirok etgan “Zakovat” qizg‘in bahs-munozaralarga boy tarzda o‘tdi. Intellektual o‘yinning yakunida 1-o‘rinni Jizzax shahar masjidlari xodimlaridan iborat “Imom Buxoriy”, 2-o‘rinni Paxtakor tumani masjidlari xodimlarining "Paxtakor" hamda 3-o‘rinni Sharof Rashidov tumani imom-xatiblaridan tuzilgan "Sharof Rashidov" jamoaci qo‘lga kiritib, g‘oliblarga diplom va esdalik sovg‘alari topshirildi.
O‘MI Matbuot xizmati