Savol: Chap qo‘lni orqaga qilgan holda, unga suyanib o‘tirish joizmi? Yoshi kattalar bu ishni “yomon” deb, qaytarishadi.

Javob: Bismillahir Rohmanir Rohiym. Yo‘q, bu ish joiz emas. Yoshi kattalar bu ishni bejizga “yomon” deb, qaytarishmagan. Zero, bu makruh amal sanaladi. Bu haqda Sharid ibn Suvayd ismli sahobiy roziyallohu anhu shunday deganlar:

مَرَّ بي رسولُ اللهِ صلَّى اللهُ عليهِ وسلَّم وأنا جالسٌ هكذا وقد وَضَعْتُ يَدِي اليُسْرَى خلفَ ظهري واتَّكَأْتُ على أَلْيَةِ يَدِي فقال أَتَقْعُدُ قَعْدَةَ المغضوبِ عليهم

“Bir kuni Rasululloh sollallohu alayhi vasallam mening oldimdan o‘tib qoldilar. Men chap qo‘limni orqamga qo‘yib, qo‘limning kaftiga suyanib o‘tirgan edim. Shunda U Zot “G‘azab qilinganlarni o‘tirishi kabi o‘tirasanmi?”, deb tanbeh berdilar” (Imom Ahmad va Abu Dovud rivoyati).

Shunga ko‘ra faqihlar “Kishi xoh bir qo‘liga suyansin, xoh ikki qo‘liga suyansin, farqi yo‘qdir. Ya’ni, har ikkala holatda ham makruh bo‘ladi”, deganlar (“Mirqotul-mafotih” kitobi asosida). Vallohu a’lam.

O‘zbekiston musulmonlari idorasi
Fatvo markazi.