O'zingizga solihlardan do'st tanlashga harakat qiling. Zero, Rasululloh sollallohu alayhi vasallam aytadilar: “Kishi do'stining dinidadir, shunday ekan, kimni do'st tutayotganingizga boqing”.

Do'st bu quvonchingizni birga baham ko'radigan, qiyinchilikda suyanadigan, xursand vaqtingizda ham, mahzun vaqtingizda ham yoniga yuguradigan, talpinadigan shaxsdir.

Uning Alloh uchun xolis do'st bo'lgani, to'g'ri yo'ldaligi doim ko'zingiz oldida tursin. Uni muhofaza qilin, o'zingizdan berib qo'ymang, chunki uni yo'qotsangiz, g'amingizga sherik bo'ladigan, sizni yaxshilikka chorlaydigan odam topa olmay qolasiz!

Abdulloh ibn Ja'far rahimahulloh aytadi: “Birga yuragningizda sizga ziynat bo'ladigan, yo'qligingizda sizni himoya qiladigan, biror nimaga muhtoj bo'lsangiz yordam beradigan, sizda biror kamchilik ko'rsa, uni boshqalardan berkitib, isloh qiladigan do'st tanlang”.

Katta-yu kichik har narsaga ham uni ayblayvermang, xatolaridan ko'z yuming, chunki mukammallik faqat Allohga xosdir!

Barmoqlaringizga qarang, hammasi bir-biriga yaqin joylashgan, faqat bosh barmoq ulardan uzoqroq. Lekin shunday bo'lsa ham barmoqlar o'zlaridan uzoqroq joylashgan boshbarmoqsiz hech narsa qila olmaydi, hech narsani ushlay olmaydi! O'zingizda bir sinab ko'ringda, boshbarmog'ingizni ishlatmagan holda yoza olarmikinsiz yoki kiyimizngiz tugmasini qaday olarmikinsiz?!

Demak, bundan kelib chiqadiki, gap atrofingizda do'stlar ko'p bo'lishida emas ekan. Gap ularning sizga mehr-muhabbatli, siz uchun foydali bo'lishidadir! Hatto sizdan uzoq joydadi bitta sodiq va solih do'st yaqingizdagi tayin-tutruqsiz mingta do'stdan yaxshi!

Qur'oni karimda bunday oyat bor: “Va Robbilariga taqvo qilganlar jannatga guruh-guruh qilib olib borildilar”(Zumar surasi, 73-oyat).

Ulamolar bunga tafsir o'laroq aytadilar: “Alloh odamlar jannatga alohida-alohida kirishini xohlamadi. Hamma do'stlar teng, birgalikda jannatga kiradilar”.

Alloh taolodan qo'limizdan tutib jannatga etaklaydigan do'stlar berishini so'raylik!

Doktor Hasson Shamsi Poshoning "Metin qoyalar" kitobidan

G'iyosiddin Habibulloh, Ne'matulloh Isomov tarjimasi.