“Al-Bahja” kitobida hazratimiz imom Bahouddin Muhammad Naqshbandiy quddisa sirruhuning o‘z muridlariga aytib qoldirgan ikki vasiyatlari bor. Tafakkur etuvchilar uchun g‘oyat qadrli bo‘lgani uchun bu ikki vasiyatni keltiramiz.

Birinchi buyuk vasiyat:

“So‘fiylik yo‘lining haqiqiy muridi, qaysi bir ulug‘ darajaga yetgan bo‘lmasin, hamisha o‘zini endi birinchi qadamini qo‘yayotgan, yangi boshlovchi sifatida ko‘rishi lozim”.

Ikkinchi buyuk vasiyat:

“Murid o‘zining tarbiyasi va ichki olamining tozaligi e’tiboridan qaysi bir yuksak cho‘qqiga ko‘tarilgan bo‘lmasin, baribir, o‘zining nafsini Fir’avnning nafsidan yuz chandon yomonroq deb e’tiqod qilishi kerak!”.

Aqlli inson, deylik, “itmi’non” — xotirjamlik deb nomlanmish baland maqomlarga ko‘tarilgan taqdirida ham nafsini o‘z holicha tashlab qo‘ymasdan, doimo nazorat qilib turmog‘i shart. Chunki hatto shunday kishilarni ham o‘z nafsining hiylayu nayrangidan to‘la himoyalangan, deb bo‘lmaydi. Shunday ekan, biz oddiy odamlar jamiyatdagi yuqori lavozimlarni yaxshi ko‘rishligimizu bunchalar xudbinligimiz bilan qanday qilib nafsimizning yomonliklaridan saqlana olishimiz mumkin?! Yo Alloh, bizlarga o‘zing tavfiq bergin.

Agar Alloh madad bermasa, bizlar o‘z holimizcha nafsimizning shumligiyu uning sanoqsiz hiylalaridan hech qachon qutila olmaymiz. Insonning yomon xulqi esa, shubhasiz, uni baxtsizlikka, isyonga sudraydi. Shu sababli ham yomon xulq-atvor – bu xastalik bo‘lib, uning dori-darmoni tariqatdir. Yoxud yomon fe’lni go‘yo ma’naviy kir, ma’naviy ifloslik deydigan bo‘lsak, tariqat uni yuvadigan toza suvdir. Kirlardan qutulish uchun suvdan foydalanish zarur! Alloh Buyuk, Olim – barcha narsani Bilguvchidir. Xulqlarimizni kamolga yetkazishimiz va yomonliklarni tark etishimizda esa har narsaga Qodir, Buyuk va Qudratli Allohning madadiga muhtojiz. Uning madadi ruhiyatimizga hayot beruvchidir.

“Axloqus solihiyn” (Yaxshilar axloqi) kitobidan
Yo‘ldosh Eshbek, Davron Nurmuhammad
tarjimasi.