1. Bomdod namozining sunnatini yengil o‘qish.

Oisha roziyallohu anhodan rivoyat qilinadi: “Nabiy sollallohu alayhi vasallam Bomdod namozida azon va iqomat orasida yengil ikki rakat o‘qir edilar” (Imom Buxoriy, Imom Muslim rivoyati).

2. Birinchi rakatda Kafirun, ikkinchi rakatda Ixlos surasini o‘qish.

Abu Hurayra roziyallohu anhu aytadi. «Rasululloh sollallohu alayhi vasallam Bomdodning ikki rakatida “Qul yaa ayyuhal kaafirun” va “Qul huvallohu ahad”ni o‘qirdilar» (Imom Muslim rivoyati).

3. Sunnatdan so‘ng ozgina yonboshlash.

“Nabiy sollallohu alayhi vasallam Bomdod namozining sunnatidan keyin o‘ng taraflari bilan ozgina yonboshlab yotar edilar” (Imom Buxoriy rivoyati).

4. Yosin surasini va Hashr surasining oxirgi uch oyatini tilovat qilish.

Ma’qil ibn Yasor roziyallohu anhudan rivoyat qilinadi. Nabiy sollallohu alayhi vasallam: «“Yosin” Qur’onning qalbidir. Kim uni Allohni va oxirat kunini umid qilib o‘qisa, albatta, mag‘firat qilinadi. Uni o‘liklaringizga o‘qinglar», dedilar (Imom Ahmad, Imom Bayhaqiy rivoyati).

Anas roziyallohu anhudan rivoyat qilinadi: «Har bir narsaning qalbi bor. Qur’onning qalbi “Yosin”dir. Kim “Yosin”ni qiroat qilsa, Alloh unga bu qiroati uchun Qur’onni o‘n marta qiroat qilgan(savobi)ni yozadi» dedilar (Imom Termiziy, Imom Bayhaqiy rivoyati).

Ma’qil ibn Yasor roziyallohu anhudan rivoyat qilinadi. Nabiy sollallohu alayhi vasallam: «Kim subh chog‘ida uch marta “A’uzu bismillahis samiy’il aliym, minash shaytonir rojiym” deb, Hashr surasi oxiridan uch oyatni tilovat qilsa, Alloh unga yetmish ming farishtani vakil qilib qo‘yadi. Ular unga kech kirguncha salavot aytadilar. Agar u o‘sha kuni o‘lsa, shahid holida o‘ladi. Kim o‘shalarni kech kirganda aytsa, xuddi o‘shandoq bo‘ladi», dedilar (Imom Termiziy rivoyati).

5. Bomdod namozidan keyin o‘sha joyda o‘tirish.

Nabiy sollallohu alayhi vasallam: “Kim Bomdod namozini o‘qib bo‘lganidan keyin namoz o‘qigan joyida to choshgoh namozini o‘qiguncha o‘tirsa, faqat yaxshilikdan boshqani gapirmagan bo‘lsa, uning xatolari, agar dengiz ko‘pigidan ko‘p bo‘lsa ham, mag‘firat qilinadi”, dedilar (Imom Abu Dovud, Imom Termiziy rivoyati).

“Nabiy sollallohu alayhi vasallam Bomdod namozidan so‘ng namoz o‘qigan joylarida to quyosh yaxshi chiqib olgunicha o‘tirar edilar” (Imom Muslim rivoyati).

6. Quyosh chiqqanidan so‘ng ikki rakat ishroq (quyosh chiqishi) namozini o‘qish.

Rasululloh sollallohu alayhi vasallam: “Kim Bomdodni jamoat bilan o‘qisa, so‘ngra quyosh chiqqunicha Allohni zikr qilib o‘tirsa, keyin ikki rakat namoz o‘qisa, uning uchun haj va umraning ajridek bo‘lur. To‘liq, to‘liq, to‘liq”, deganlar (Imom Termiziy rivoyati).

7.So‘ngra zuho (choshgoh) namozini o‘qish.

Abu Hurayra roziyallohu anhudan rivoyat qilinadi. Nabiy sollallohu alayhi vasallam: “Kim choshgoh namozini muhofaza (bardavom) qilsa, uning gunohlari agar dengiz ko‘pigicha bo‘lsa ham mag‘firat qilinadi”, dedilar (Imom Termiziy rivoyati).
 

Davron NURMUHAMMAD