1. “Allohumma ajirniy minan nar” duosini o‘qish.

Muslim ibn Horis Tamimiy roziyallohu anhudan rivoyat qilinadi: Rasululloh sollallohu alayhi vasallam: «Shom namozini o‘qib bo‘lganingdan keyin yetti marta “Allohumma ajirniy minan nar” “Allohim, meni do‘zaxdan saklagin”, deb aytgin. Agar sen o‘shani aytsangu mazkur kechada o‘lsang, senga undan saqlanish yoziladi. Bomdodni o‘qib bo‘lganingda ham o‘shani aytgin. Agar shu kunda o‘lsang, senga undan saqlanish yoziladi», dedilar.

2. “Laa ilaha illallohu, vahdahu laa shariyka lahu, lahul mulku, va lahul hamdu, yuhyi va yumiytu va huva ’ala kulli shayin qodiyr” deb aytish.

Umora ibn Shabiyb Saba’iy roziyallohu anhudan rivoyat qilinadi. Nabiy sollallohu alayhi vasallam: «Kim shomdan keyin o‘n marta “Laa ilaha illallohu, vahdahu laa shariyka lahu, lahul mulku, va lahul hamdu, yuhyi va yumiytu va huva ’ala kulli shayin qodiyr”

“Yakka Allohdan boshqa iloh yo‘q. Uning sherigi ham yo‘q. Barcha mulk Allohnikidir va hamd Uning uchundir. U (Zot) tiriltiradi va o‘ldiradi. U har bir narsaga qodirdir” desa, Alloh uni tong otguncha shaytondan muhofaza qiladigan farishtani yuboradi. Alloh unga bu ila vojib bo‘lgan o‘n hasanot yozadi, uning o‘nta halok qiluvchi xatosini o‘chiradi va bu uning uchun o‘nta ozod qilingan qul kabi bo‘ladi», dedilar (Imom Termiziy rivoyati).

3. Voqea surasini tilovat qilish.

Ibn Ma’sud roziyallohu anhudan rivoyat qilinadi. Rasululloh sollallohu alayhi vasallam: “Kimki har kechada Voqea surasini o‘qisa, zinhor kambag‘allikka duchor bo‘lmaydi”, dedilar.

Anas ibn Molik roziyallohu anhudan rivoyat qilinadi. Rasululloh sollallohu alayhi vasallam aytadilar: “Voqea surasi boylik (keltiruvchi) suradir. U (sura)ni o‘qinglar va farzandlaringizga o‘rgatinglar” (Ibn Mardavayh rivoyati).

Boshqa hadisda Rasululloh sollallohu alayhi vasallam: “Ayollaringizga Voqea surasini o‘rgatinglar. Zero, u boylik (keltiruvchi) suradir”, deganlar (Imom Daylamiy rivoyati).

4. Ushbu duoni o‘qish.

Ummu Salama roziyallohu anho onamiz aytadilar: “Rasululloh sollallohu alayhi vasallam shom namozidan forig‘ bo‘lsalar, uylariga kirib, ikki rakat namoz o‘qib: “Yaa muqollibal qulubiy val absor, sabbit qulubana ’ala diynik”

“Ey qalb va ko‘zlarni o‘zgartiruvchi Zot, qalbimizni diningda sobit qil”, deb duo qilardilar (Imom Ibn Sunniy rivoyati).

Davron NURMUHAMMAD